Guwahati, Risaw:
Ki la don 9 ngut ki bar ri, kiba wan rung be-aiñ sha India, ki la shah kem ha ka Dhubri distrik jong ka Assam bad la aiti ïa ki sha ki bor pahara khappud (BSF), ong u Myntri Rangbah ka jylla u Himanta Biswa Sarma.
Hynrei u Sarma um shym la ïathuh bniah shaphang ka jaitbynriew jong ki nongwan rung tuh ne shano la kem ïa ki.
La aiti ïa ki 9 ngut ki nongwan rung be-aiñ sha ki shipai BSF, ban pynphai ïa ki lyngba u pud India-Bangladesh,” la ong u Sarma ha ka post ha ka rynsan X ha ka miet jong ka sngi Ba-ar.
Ki district Sribhumi, Cachar, Dhubri bad South Salmara-Mankachar jong ka Assam ki ïasam lang ïa u pud u sam jong ka pyrthei bad ka Bangladesh kaba 267.5 km.
Ka don ka Integrated Check Post (ICP) ha Sutarkandi kaba don ha Sribhumi jong ka Assam. Ka thaiñ Shatei-lam-Mihngi ka don baroh lai tylli ki ICP ha shi lynter ka khappud India bad Bangladesh, bad kiwei pat ki ar tylli ki dei ha Dawki ha Meghalaya bad ha Akhaura ha Tripura.
