Imphal, Risaw:
Ka jingbteng jong ka jingïakynad bad ka jingïapher jingmut hapoh ka jylla Manipur ka la buh ïa ka jingeh bakhraw halor ka jingpynkhreh ka seng synshar Bharatiya Janata Party (BJP) na ka bynta ka elekshon ban wan ha Manipur bad ka jingthmu jong ka ban bat ïa ka bor synshar ha ka jylla ha ka samoi kaba lai.
Ka Jylla Manipur, kaba la thmu ban pynlong ïa ka jingthep vote, ha ka sdang u snem ryng kat bad ka Punjab, Uttar Pradesh, Goa bad Uttara khand mynta la hap ban pynsangeh noh shwa ïa kane hadien jong ki kyrnum kynram kiba kane ka jylla ka la mad ha kine ki sngi bad por ba mynta.
Ki nongïalam ka seng BJP ka jylla ki la ong ba ki dang shaniah ha ka sorkar pdeng ban pynphai biang ïa ka jingsuk ha ka jylla kaba la shah ktah bad ban pynbeit ïa ka jingïapher hapdeng ki jaitbynriew kiba ïaleh thma shwa ba ka jingthep vote kan sdang.
“Baroh ar ka seng bad ka sorkar jylla ki la pyrshang ban pynkut noh ïa ki kam thombor kiba la pynlong ïa kiba bun ban ïap bad ban phetwir. Hynrei ka donkam ban shim kham bun ki sienjam ha ka saiñ hima sima bad ha ka liang ka synshar khadar ban pynkut noh ïa kane ka jingïakynad kaba la ïaid naduh u snem 2023…” ong uwei u nongïalam ka seng.
Ka Manipur ka la shah pyndik ha ka jingshah thombor naduh u bnai Naitung 2023, ha kaba ki jingïakynad jaitbynriew ki la mih nyng kong eh hapdeng ki jaitbynriew Meitei kiba don bor bad ki jaitbynriew Kuki.
Naduh kata ka por, la jan manla ka jaitbynriew ka la shah ktah ha ka jingshah thombor kaba la nang jur bha kaba la pynlong ïa ka jingpynthut ïa ka shongsuk shongsaiñ.
Ha ka 4 tarik u Rymphang 2026, u Yum nam Khemchand Singh, u Lamphang ka iing dorbar thawaiñ jong ka Manipur, uba dei ruh u nongïalam ka BJP, uba dei u Meitei, ula bam smai kum u myntri rangbah ka Jylla.
Ryngkat bad u Singh, arngut ki symbud myntri rangbah kiba mihkhmat ïa ki jaidbynriew Kuki-Zo bad Naga — u Losii Dikho bad u Nemcha Kipgen — ki la bam smai ruh ha ka jingïalang kaba rit paid ha Lok Bhavan ha Imphal.
Hynrei ka jingpynbeit thymmai jong ka sorkar ruh ka la wan ia ka jingeh bakhraw bad ka jingïadei hapdeng ka Dikho bad Kipgen ka la nang sniew hapdeng ka jingïakynad ki dkhot jong ka jaitbynriew Naga bad Kuki.
Ha ka 1 tarik Naiwieng, u Dikho bad 8 ngut kiwei pat ki nongthaw aiñ ka Naga, ki la thoh sha u Amit Shah, Myntri kam pohïing ka sorkar pdeng, ban pan eiei pyrshah ïa ka Kipgen bad u lok jong ka, da kaba kynnoh ba ki ïatreilang bad ki ehrang Kuki.
U Kipgen u la kyntait ïa katei ka jingkynnoh da kaba ong ba ka jylla ka la phiah. Ha ki katto katne ki khep, ki bor synshar ba ha khlieh duh ki hap ban rung shapoh… wat mynta ruh, haba don u Myntri Rangbah ba thymmai (u Yumnam Khem chand Singh)ha ka bor synshar, ki don ki ktem bad ki kynhun kiba teng teng ki i kumba ki trei halor ki jingthmu bapher bapher,” ong uwei na ki nongialam.
Katkum ka jingong jong u nongïalam, ka Centre kan donkam ban pynbna ïa ki lad pynbha bad jingïarap ba kyrpang kum ka sienjam ba nyng kong.
