Guwahati, Iaïong:
Ka seng kieng atiar kaba na ka jylla Assam, ka Dimasa National Liberation Army (DNLA) ha ki khyndiat sngi kiba la leit noh ka la pynbna ïa ka rai ban pynjlan shuh shuh ïa ka soskular sangeh ïasiat bad ka sorkar. Haba pyllait khubor, na ka liang u Juhthai – chairman jong ka DNLA u la pyntip ba u la phah da ka shithi sha u Myntri Rangbah ka jylla ban pyntip ïa ka rai jong ka seng ban pynjlan ïa ka soskular sangeh ïasiat sa da 6 bnai lynter.
Kat kum ka kyrwoh ba la pyllait da ka seng, la pyntip ba na ka liang ka DNLA ka la rai ban pynjlan bad pynbteng treikam ïa katei ka soskular naduh u bnai Ïaïong 2023 haduh ka 30 tarik u Nailur, 2023 na ka bynta ka suk ka saiñ bad kumjuh ruh na ka bynta ban pynsuk ïa ki sienjam kiba ïadei bad ka jingïakren ïasuk jong ka seng bad ka sorkar.
Kat kum ki jingïoh lum khubor la ïathuh ba dei ha u Nailur, 2021 ba ka seng DNLA da kaba ai jubab ïa ka jingïawer jong u Myntri Rangbah ka Assam na ka bynta ban wanrah ïa ka shong suk shong saiñ ha ka jylla Assam, ka la pynbna ban pyntreikam da ka soskular sangeh ïasiat bad ki bor pahara jong ka jylla da 6 bnai kynthih.
Ka jingpyntrei kam ïa ka soskular sangeh ïasiat ka la jia ruh haduh 2 taiew hadien ba ka seng DNLA ka la shah kynnoh ba ka la donkti ban hiar thma bad ther kuli pyrshah ïa kawei ka kynhun shipai knailar, ki la don ruh haduh 5 ngut ki briew kiba la kyllon ïap bad uwei par u ba la ïoh ïa ki jingmynsaw.
Kum ban shu ïathuh hangne, ïa ka seng DNLA la seng ha u bnai Ïaïong, 2019 bad ka thong kaba hakhmat eh jong ka seng ka long ban pynïoh ïa ka jinglaitluid na ka bynta ki paid Dimasa.
Ka seng DNLA ka trei kam ha ki thaiñ Karbi Anglong bad Dima Hasao district jong ka jylla Assam bad kumjuh ruh ha ki katto katne tylli ki bynta jong ka jylla Nagaland.
