Taipei, Iaïong:
Ka tnat ïada Ri jong ka Taiwan ha ka Sngi Ba-ar ka la iathuh ba ki bor pahara jong ka ri, ki la iohi ïa 5 tylli ki liengsuiñ thma bad 4 tylli ki jhad thma ka China kiba don hapoh u pud- u sam haduh ka por kumba 6 baje jong ka step Sngi U Blei (2 tarik Iaiong 2023) bad kumjuh ruh ha ka step Lah Sngi U Blei (3 tarik Iaiong 2023).
Kumta ruh ka tnat iada ri jong ka Taiwan ka la iathuh ba ka China ha kine ki sngi ka la phah ïa ki liengsuiñ bad ki jhad jongka ban leit syntiat bad ban rung ruh wat hapoh u pud- u sam jong ka Taiwan khlem da ïoh ïa ka jingbit ne jingpyntip eiei sha ki tnat iada jong ka Taiwan. Namarkata ruh la ong ba ka Taiwan kan shu long ba la pynkhreh lypa ïoh kino kino ki jingjia kin wan jia ha ka por bym lah tip khnang ba kan lah ban iada ruh ïa u pud- u sam jongka lada kum kitei ki jingjia kin wan kumba long ïa ka Ukraine ha kane ka por.
La ong ba wat ha ka Sngi Saitjaiñ jong ka taiew ba la leit ruh, ka Taiwan ka la lap ïa 10 tylli ki liengsuiñ bad 3 tylli ki jhad thma jong ka China kiba iaid bad tawiar ïa ka Taiwan ha katei ka taiew ba la lah.
Napdeng jong ki 10 tylli ki liengsuiñ ka People’s Liberation Army (PLA) kiba la iohi ha katei ka por, 4 tylli ki KA-28 Anti-submarine Warfare Helicopter ki dei kiba leit rung sha ki bynta ba kyndong jong ka Air Defence Identification Zone (ADIZ) jong ka Taiwan. Watla katta, la ong ba ym shym don k liengsuiñ jong ka PLA ki ban leit tur ne iaid lait ïa ka Taiwan Strait ha kane ka kynti.
