Brussels, Iaïong:
Katkum ki khubor la iathuh ba ka Finland ha ka Sngi Ba-ar ka la long ka dkhot ba 31 jong ka NATO, ha kaba la ong ba ka Russia ka la sngew bitar haba iadei bad katei ka jingpynrung dkhot thymmai jong ka NATO ha kane ka kynti.
U Secretary General ka NATO, u Jens Stoltenberg ha katei ka sngi u la ong ba ka NATO ha kane ka kynti ka la nang khlaiñ bor bad nang ïar shuh shuh hadien ba ka la ioh ban pdiang ia ka Finland kum ka dkhot ba thymmai jong ka.
Namar kumba la iohi ba ka Russia ka la hiar thma ia ka Ukraine mynta la shi snem lynter bad kumta ruh la ong ba ka long kaba bha shibun ia ka Finland ba kan rung noh ha katei ka thup jong ki ri ka NATO, naka bynta ka jingshngaiñ jongka lada kino kino ki jingjia kin wan hadien habud.
U Myntri ka tnat iada ri jong ka Finland, u la pynpaw ka jingsngew kmen bad ka jingsngew shngaiñ kaba khraw hadien ba ki heh ka NATO ki la pdiang ia ka Finland ba kan long ka dkhot ba pura jong katei ka kynhun.
Katba, ka Russia pat ka la ong ba katei ka jingpynrung dkhot thymmai bad ka jingpyniar jong ka NATO ka long ka jingma kaba khraw ia ka Russia. Bad ha kajuh ka por ruh la ong ba kane ka lah ban wanrah ia kiwei pat ki jingthmu na ka Russia ha kine ki sngi ban wan.
