Tehran, Iaiong:
Katkum ki khubor la ong ba 20 ngut ki khynnah skul jong ka Iran ha ka Sngi Ba-ar ki la kem pang hadien ba ki la ioh ring mynsiem ia ka lyer bih ha katei ka sngi.
Hadien ba la rah ia ki sha jaka sumar la shem ba kitei ki khynnah ki don jingshitom ha ka ban ring mynsiem bad kane ka la jia ha Tabriz, kaba long ka nongbah jong ka East Azerbaijan.
La ong ba ki kynhun jong ka tnat ka koit- ka khiah ki la leit her mar-mar sha katei ka skul tang mar ia ioh ia katei ka khubor halor ka jingkem pang ki khynnah skul jong kawei ka skul ha Tabriz.
Ia mynta, ka jinglong jingman jong kitei ki khynnah skul ka la biang bad ki la lait na ka jingma.
Kumjuh ruh la ong ba ha u Naiwieng jong u snem ba la leit, palat 5,000 ngut ki khynnah skul jong ka Iran ki la kem pang bad don ia ki jingshitom kum ka jing king baiong, dap shadem bad ka jingshitom ban ring mynsiem, nalor jong kiwei de ki jait jingshitom ba kitei ki khynnah skul ki ioh kem pang ha utei u snem 2022.
Namarkata ruh la ong ba katei ka jingïoh kem pang jong ki khynnah ha kumba 230 tylli ki skul jong ka Iran, ka la wanrah ka jingsheptieng ia ki kmie- ki kpa bad ki bahaiing- hasem bad ia ki paidbah nongshong shnong jong ka ri hi baroh kawei namar ka jingbym shngaiñ jong ki khynnah ba kin leit sha ki jaka pule.
Hynrei la ong ba ha kane ka kynti, hadien ba la plie biang ia ki skul hadien ka shuti Nowruz ba 2 taiew, ka long kaei kaei kaba sngewphylla ba kitei ki khynnah pule ki la ioh kem pang ha katei ka sngi.
Kumjuh ruh ha u Lber, ki bor pyniaid ka Iran ki la pynbna ba la kem noh ia kumba 100 ngut kiba don kti ha kaba pyllait ia katei ka lyer bih bad kumta ruh la pynngat kyndon pynkheiñ aiñ pyrshah ia baroh kitei kiba don kti ha katei ka kam.
U Ayatollah Ali Khamenei u la ong ba ki bor pyniaid ka Iran kin ym ailad ia kum kitei ki nongleh kam sniew bad kiba thmu ban pynthud ia ka shongsuk- shongsaiñ hapoh ka ri bad ba yn pynshitom bad pynngat kyndon pynkheiñ aiñ ia kito kiba don kti baroh ha katei ka kam thombor.
Katei ka jingïoh pang ki khynnah skul, ka long hadien 2 bnai ka jingiakhih paidbah jong ki nong Iran halor ka jingkhlad jong ka samla 22 snem, ka Mahsa Amini hadien ba ka la shah kem bad shah rah ha ki pulit ka Iran tang namar ba kam shym la kup ia ka jaiñ kup ‘Hijab’ kumba ki kynthei hapoh ka ri ki ju leh khamtam haba mih sha ki jaka paidbah bad shabar n ka iingsah jong ki.
