Washington, Iaïong:
U President barim ka United States, u Donald Trump u la ong ba ka thma bah Nuclear kaba III kan ym slem shuh lada ka sorkar United States ka dang hap hapoh ka kti jingsynshar jong u Biden.
Ka jingkren jong utei u nongialam barim ka US, u Trump uba la don ruh 76 snem ka rta ha kane ka kynti, ka long hadien ka jingai jingkren paidbah ba nyngkong jong u kaba u la kren ha ka Sngi Ba-ar.
La ong ba u Trump ha kane ka por, u la kyntait bad thet-kti ia baroh ki kam sniew ba la pynngat bad pharep pyrshah ia u da ka ïingbishar haba iadei bad ka jingphah pisa sop-sop jong u sha ka kynthei dakaid ka ‘Stormy Daniels’ ha ki por ba la leit.
Kumta, ha kane ka kynti pat, u Trump u la ong ba ka United States ka la ïohsngew ia shibun ki khubor byrngem na ki ri bapher jong ka pyrthei haba iadei bad ka thma Nuclear, bad ka long ruh kaei kaei kaba ka United States kam pat ju ïohsngew ne ioh mad ia kum kitei ki jingbyrngem ha ki por ka jingsynshar jong ka sorkar jong u.
Namarkata u la ong ba kane baroh ka dei namar ka jingsynshar jong ka sorkar u Biden hapoh United States bad lada ym dei kumta, kine baroh kin ym jia bad shuh shuh ruh u la ban jur ba ka thma bah Nuclear kaba 3 (World War III) kan sa jia shen, kam pher lada ki briew ki ngeit ne kim ngeit ia kata.
Namar u la ban jur ruh ba ka United States mynta ka la pulom lut hapoh ka jingialam jong u President ba mynta, u Joe Biden.
U Trump u la kynnoh ruh ba ka US ka la hiar naduh ka liang ha ka ioh- ka kot, ka jingkiew dor ki mar- ki mata bad wat ha ka jing-iadei bad kiwei pat ki para marjan ri ruh kam beit bad kam biang shuh kumba long baroh shi katta namar dei u Biden u bym lah ban pyniadei bad kiwei pat ki ri.
Shuh shuh ruh u la ong ba ha kine ki sngi, la iohi shai ia ka jingiatrei lang bad ka jing-iatylli jong ka China, Russia, Iran bad ka North Korea ha ryngkat ki jingbyrngem- byrsit ia ka United States bad ia kiwei ruh ki ri ba marjan bad u la ong ruh ba kane kam pat ju jia hapoh ka jingialam ka sorkar jong u. Hynrei kine baroh ki wan jia tang ha kane ka por ba ioh synshar ka sorkar u Biden.
Kumta ruh u la ong ba, lada u dei ma u, u President jong ka United States ha ka jaka jong u Biden ha kane ka por, kitei baroh kin ym jia satia bad wat ka Russia ruh kan ym leit hiar thma ia ka Ukraine kumba ka long mynta.
Baroh ki mynsiem kin jin da la lait im lut. Hynrei u la ong ba kine baroh ki la shu jia khlem nongrim namar ka jingshah ialam bakla ha ka sorkar u Biden.
Ha kajuh ka por ruh u la ong ba wat ka pisa jong ka United States ruh kan sa hiar arsut bad kan sa poi ka por ba ka US kan sa shah tam bad kan sa shah knieh ia ka nam ha kiwei pat ki ri.
Namarkata ruh u Trump u la kynnoh ba u Biden u la pynjot ia ka ri United States naduh ba u ioh ban long u nongialam jong ka US ha kine ki snem mynta.
Shuh shuh ruh u Biden u la kynthoh ia u Biden bad ia ka sorkar u Biden, ha kaba u la ong ba, lada phin peit thuh ia 5 ngut ki President kiba trei sniew eh ruh hapoh ka ri, hynrei kitei ki jingleh jongki, kim pat long eiei hakhmat u Biden bad hakhmat ki jingleh jong ka sorkar u Biden.
