Brazil, Iaïong:
Ha kane ka khubor la iathuh ba uwei u nong Brazil, 25 snem ka rta, u la leit rung be-aiñ sha kawei ka skul bad pom iap ia 4 ngut ki khynnah rit kiba don ha katei ka jaka ha ka Sngi Balang hashwa ba un leit aiti noh ialade ha khmat ki pulit.
La ong ba utei u runar u la leit ban kiew shitom najrong ki kynroh ba la ker khnang ba un ioh ban rung shapoh phyllaw jong katei ka skul ‘Pre-school’ kaba don hapoh ka nongbah Blumenau bad kaba la tip kum ka Good Shepherd Center.
Hadien kata la ong ba u la mih na katei ka skul da ka thuk thuk ban leit pyndem noh syndon ialade hakhmat ki pulit.
Kumta la ong ba ki paidbah ki la ialum ha katei ka phyllaw skul ha katei ka sngi, ha ryngkat ka jingpar ñiangkhriat ban iohi ia ka dak mong shah pom jong kitei ki khyllung kiba la ngat ha katei ka jingjia ba shem pap ha katei ka sngi.
Ha katei ka sngi la ong ba ki pulit bad ki tnat iarap ki la shah rung tang ia ki kmie ki kpa shapoh jong katei ka phyllaw skul bad la khang noh ia kiwei pat ki briew ba nabar.
Kawei na ki nongtrei jong katei ka skul, ka la iathuh ba ym shym la don ba iohi ia utei u briew ha ka por ba u wan rung shapoh ka phyllaw jong katei ka skul tat hadien kumba katto katne por ba ka dang mih shabar, kynsan ka la iohi ia kitei ki khyllung rit kiba la thiah iap ha madan, ha kaba ka la pyrshang ban pynim da ka rukom ‘CPR’ ia uwei na kitei ki khyllung hynrei la ong ba baroh 4 ngut ki la khlad noh khlem da ioh wat tang ban pynkit sha jaka sumar.
La iathuh ba utei u runar ha katei ka jingjia, u la pom ia kitei ki 4 ngut ki khyllung na ki bynta jong ka khlieh.
Kitei ki 4 ngut kiba khlad, ki kynthup ia 3 ngut ki khyllung shynrang bad iwei i kynthei.
Katba, don ruh sa 4 ngut ki khyllung kiba la mynsaw bad ngat ha ka jingleit thombor dusmon jong utei u runar ha katei ka jaka, kiba kynthup ia 2 ngut ki khynnah shynrang ba 3 bad 5 snem bad 2 ngut ki khynnah kynthei ba 5 snem ka rta.
Kawei ka nonghikai ka la iathuh ba ka la leit ban pyn rieh ia ki khynnah kiba bun ha ka painkhana jong katei ka skul namar ka jingsheptieng ioh utei u runar un pyniap dusmon ia baroh ki khynnah kat kiba don ha katei ka jaka. Namar la iohi ruh ba utei u runar u la pom naphang ia kat kiba u ioh ha katei ka por.
