Dimapur, Jymmang:
Ki bor pulit jong ka jylla Nagaland ki la pyntip ba ha ka 3 tarik mynta u bnai ki la ïoh ban kem ïa 4 ngut ki snar nongtuh kali na ka nongbah Dimapur.
Kat kum ka kyrwoh ba la pyllait da ka tnat pulit, la ïathuh ba ïa kitei ki nongtuh kali la ïoh ban kem hadien ba ki bor pulit ki la ïoh ïa ki lad jingïarap na ki dkhot jong ka Pimla Village Council.
Kat kum ka kyrwoh na ka shlem treikam u DCP (crime), Dimapur la ïathuh ba ki bor pulit ki la ïoh ruh ban kurup ïa 3 tylli ki ar shaka bad kawei ka kali kaba don ïa u ‘registration number’ AS 12P 1424, ba kitei ki runar ki ju pyndonkam ha ki kam beaiñ jong ki.
Ïa baroh ki 4 ngut kiba la shah kem ha katei ka sngi bad ïa ki ar shaka bad kali ba la ïoh ban kurup la leit ban aiti noh sha ki bor pulit ka Dimapur sub-urban police station khnang ban pynlong ïa ki jingtohkit kiba dang sah.
Ki 4 ngut ki snar nongtuh kiba la shah kem ha katei ka sngi ki kynthup ïa u Vito Awomi (37 snem ka rta), u dkhot ka NSCN (IM) – Tokato Awomi (29 snem ka rta), u Kitoka Awomi (35 snem ka rta) bad u Kughashe Swu (30 snem ka rta).
Baroh 4 ngut ki runar kiba la shah kem ha katei ka sngi ki dei ki nongshong shnong na ka thaiñ Pimla, Dimapur district.
