Itanagar, Jymmang:
Ki bor sorkar jong ka jylla Arunachal Pradesh ha ka 2 tarik mynta u bnai ki la ïathuh ba uwei u samla u ba la tip kyrteng kum u Mithai Marandi, u ba la shah siat ha ki riew runar ha Namsai, Arunachal Pradesh ha ka taiew kaba la dep u la khlad noh na ka daw jong ki jingmynsaw ba jur.
Ki la pyntip ba u Mithai Marandi u ba dei u nongñiah kali jong u trai ka jaka theh umphniang kali (Bharat Petroleum outlet) kaba don ha ka shnong Namsai u la khlad noh hapdeng ka jingshah sumar ha kawei ka hospital kaba don ha ka thaiñ Dibrugarh district jong ka jylla Assam.
Kat kum ki jingïoh lum khubor la ïathuh ba na ka liang ki runar kiba donkti ha katei ka kam beaiñ ki la rahbor ruh ïa u nonglum pisa (cashier) jong katei ka jaka theh umphniang kali bad siat haduh 3 kuli ïa u Mithai Marandi.
Halor katei ka jingjia, na ka liang ki bor pulit jong ka jylla ki la suba jur ba dei ki dkhot seng kieng atiar kiba la donkti ha katei ka kam beaiñ ban siat ïap ïa u Marandi bad rahbor ruh ïa u nonglum pisa jong katei ka jaka theh umphniang kaba dei trai da u Dinesh Sharma.
