Imphal, Jymmang:
Ki bor sorkar jong ka jylla Manipur ha ka 3 tarik mynta u bnai ki la pyntip ba ki jingïakajia bad jingklumar kiba jur ki la jia biang ha kylleng ki bynta jong ka thaiñ Churachandpur district bad kumjuh ruh ha ki katto katne ki jaka jong ka Bishnupur Sistrict.
Ha kitei ki jingjia la ïathuh ba ki la don bun tylli ki ïing kiba la shah wiang ding bad bun ngut ruh ki briew kiba la ïoh ïa ki jingmynsaw – kaba la pynlong ruh ïa ki bor pulit jong ka jylla ban pyndonkam bad siat da ki ktang suloi bad da ki tyngdong pynsat khmat khnang ban pynphet krad ïa ki paidbhur kiba la don bynta ha kitei ki kam beaiñ.
Kat kum ki jingïoh lum jingtip la ïathuh ba ki la don ruh katto katne ngut ki paidbah kiba la ïoh ïa ki jingmynsaw hadien ka jingshah siat ha ki pulit ka jylla.
Ki jingïakajia ha ka thaiñ Chura-chandpur district ki la jia hadien ka jingïaïaid paidbah kaba la khot bad pynlong da ka All Tribal Students’ Union, Manipur (ATSUM) ban dawa na ka sorkar ba ka dei ban ïada ïa ka hok jong ki nongshong shnong trai muluk.
Ïa katei ka jingïaïaid paidbah la khot bad pynlong da ka ATSUM kum shi bynta ban pynpaw ïa ka jingpyrshah halor ka jingdawa jong ka kynhun jaitbynriew Meitei ban ïoh ïa ka kyrdan Schedule Tribe (ST).
Ha ka jingïaïaid paidbah kaba la pynlong ha ka thaiñ Churachandpur district la ïoh jingtip ba ki la don ki runar kiba la donkti ban thaw jingkulmar ha bun tylli ki kyntoit jong ka thaiñ kiba kynthup ïa ka Bungmual, Singnat, Muallum, Mata Mualtam bad kiwei kiwei. Ha katei ka jingkulmar kaba jur, na ka liang ki runar ki la donkti ruh ban wiang ding ïa katto katne tylli ki shlem trei kam jong ka Tnat Khlaw.
Ha kawei ka liang, ka sorkar jylla kum shi bynta ban tehlakam ïa ki jingkulmar ka la pynjari da ka korphiw ha baroh ki bynta jong ka thaiñ Churachandpur district – khamtam ha Kangval, Tuibong bad Chaurachandpur sub-division.
Halor kitei ki jingjia la ïoh jingtip ba na ka liang ka sorkar ka la phah ruh da ki bor shipai ka Indian Army bad Assam Rifles ha ryngkat ka jingïatreilang bad ki bor pulit jong ka jylla ba kin pahara ïa ka thaiñ na ka bynta ban khanglad ïa kino kino ki jingkulmar kiba lah ban jia biang.
Haba phai sha kawei pat ka khubor, la ïathuh ba na ka liang ki bor shipai ka Indian Army bd Assam Rifles ki la shim ruh da ki sienjam ban pynbiang ïa ki lad jingïarap ïa kumba 4,000 ngut ki nongshong shnong kiba la shah ktah na katei ka jingjia. Ïa kitei ki nongshong shnong la leit ban pynsah shipor ha ki COB jong ki tnat shipai bad ha ki katto katne ki jaka sorkar kiba don ha kylleng ki thaiñ.
La ïoh jingtip ruh ba na ka liang ki tnat shipai ki la pynlong ruh da ki ‘Flag march’ khnang ban tehlakam ïa ki jingïakajia.
