Agartala, Jylliew:
Ki nongïalam jong ka seng BJP na ka jylla Tripura ha ki khyndiat sngi kiba la leit noh ki la pyntip ba u National President jong ka BJP – JP Nadda un sa wan ban jngoh ïa ka jylla Tripura ha ka 18 tarik mynta u bnai ban leit ïashim bynta ha kawei ka jingïalang paidbah jong ka seng kaba la buh ban pynlong ha ka thaiñ Santirbazar.
Kat kum ki jingïoh lum khubor la ïathuh ba na ka liang u Myntri Rangbah jong ka jylla – Dr. Manik Saha lem bad u State President ka BJP – Rajib Bhattacharjee ki la dep ban pynlong ïa ki jingïalang abd ki nongïalam jong ka seng ban ïasyllok halor ki kam kiba ïadei bad ka jingpynkhreh na ka bynta katei ka jingïalang paidbah – kaba dei ruh shi bynta na ka jingpynkhreh jong ka seng ïa ka ilekshon Lok Sabha ka ban sa long ha u snem u ban wan.
Kum ban shu ïathuh hangne, ha ka jylla Tripura ki don ar tylli ki ‘parliamentary constituency’ – kawei ha ka ka thaiñ Tripura West bad kawei pat ha ka thaiñ Tripura East. Ha ka ilekshon kaba la pynlong ha u snem 2019, ki kyrtong jong ka BJP ki la ïoh ban rah ïa ka nam jop na kitei ki 2 tylli ki thaiñ.
Ha ka jingïakren bad ki lad pathai khubor, na ka liang u State President jong ka seng BJP u la pyntip ba u JP Nadda un sa wan ban jngoh ïa ka jylla Tripura ha ka 18 tarik mynta u bnai bad leit ruh ban ai jingkren ha ka jingïalang paidbah kaba la buh ban pynlong ha ka thaiñ Santirbazar, South Tripura district. U la pyntip shuh shuh ba ïa katei ka jingïalang paidbah la buh ban pynlong kum shi bynta ban rakhe ïa ka lyngkhuh dap 9 snem jong ka Sorkar Pdeng hapoh ka jingïalam jong u Myntri Rangbahduh jong ka ri – Narendra Modi. U la pyntip shuh shuh ba ha katei ka jingïalang, kan sa don ruh ka jingpyni paidbah ïa ki sienjam kiba ka sorkar BJP ka la shim naduh u snem 2014 na ka bynta ban pynbiang ïa ki lad jingïarap na ka bynta ki duk ki rangli.
Na ka liang u State President u la pyntip shuh shuh ba ka seng BJP ka la shim ïa ki sienjam kiba kyrpang na ka bynta ban pynkhlaiñ shuh shuh ïa ka seng ha ka jylla Tripura.
Ha ka jingïalang bad ki lad pathai khubor, na ka liang u Bhattacharjee u la pyntip shuh shuh ba ïa baroh ki prokram jong ka seng BJP ha ka jylla Tripura la pynsangeh ha ka sngi Saitjaiñ ba la dep kum ka dak ban kynmaw burom ïa ki lanot kiba la ngat ha ka jingjia ïatakhuh rel kaba shyrkhei kaba la jia ha Odisha.
U la pyntip ba ïa ki prokram bapher bapher jong ka seng BJP ha Tripura la lah ban pynbteng biang ha ka sngi U Blei ba la dep (4 tarik, Jylliew, 2023).
