Guwahati, Jylliew:
Ki bor pulit jong ka jylla Assam na ka thaiñ Cachar ha ka sngi Saitjaiñ kaba la dep ki la leit ban pynlong ïa ki jingkhynra kiba jur pyrshah ïa ki kynhun khaïi drok bad ha katei ka jingleit khynra ki la ïoh ban kurup ïa haduh 2.2 kilo u drok Heroin ba la song bad thep bha ha ki 143 tylli ki synduk sabon rit. Ïa utei u drok, ki bor pulit ki la ïoh ban kurup na ka thaiñ Silchar.
Ha katyei ka jingleit khynra jong ki, ki la ïoh ruh ban kem ïa 2 ngut ki runar kiba la tip kyrteng kum u Faizal Laskar bad u Hakimul Barbhuiya. La ïoh ban kem ïa ki na ka shnong Katagashtal, Silchar.
Kat kum ka jingpyllait kyrwoh jong ka tnat pulit, la pyntip ba dei hadien ba ki jingïoh ïa ki jingtip kiba bniah ba ki bor pulit ki la leit ban pynlong ïa ka jingkhynra ha ka ïing sah jong u Faizal Laskar bad dei na katei ka ïing ba ki la ïoh ban kurup ïa u droks. Hadien katei ka jingjia, la ïathuh ba na ka liang u Myntri Rangbah jong ka jylla – Himanta Biswa Sarma u la pyllait ïa ka kyrwoh ban ai ïa ka jingïaroh ba khraw ïa ka tnat pulit jong ka thaiñ Cachar bad kyntu ruh ïa ka tnat pulit ba kan dang ïai pynbteng ïa ki kam khynra pyrshah ïa ki nongkhaïi drok ha kylleng ki bynta jong ka jylla.
