Guwahati, Jylliew:
Ki bor pulit jong ka jylla Assam ki la pyntip ba ha ka sngi Saitjaiñ kaba la dep ki la ïoh ban kem ïa uwei u dkhot jong ka seng kieng atiar Kamtapur Liberation Organisation (KLO) na kawei ka shnong kaba don ha ka thaiñ Sivasagar district.
U dkhot ka KLO u ba la shah kem ha katei ka sngi u dei u ba la tip kyrteng kum u Mridul Barman – u nongshong shnong ka thaiñ Charaideo.
Kat kum ki jingïoh lum khubor la ïathuh ba u Barman u dei ruh u dkhot seng kieng atiar u ba don ïa ka jingïadei kaba ïajan bha bad ka seng United Liberation Front of Asom-Independent (ULFA-I). Na ka liang ki bor pulit jong ka jylla ki la pyntip ba mynta ki dang pynlong ïa ki jingtohkit kiba bniah ban lap la u Barman u don sa ïa kiwei kiwei ki jingïadei bad kiwei kiwei ki seng kieng atiar jong ka jylla bad kumjuh ruh jong ka thaiñ shatei lam mihngi.
Kum ban shu ïathuh hangne, ka seng Kamtapur Liberation Organisation (KLO) ka dei kawei na ki seng kieng atiar kaba trei kam ha ka thaiñ shatei lam mihngi jong ka ri India – khamtam ha ka jylla Assam bad kumjuh ruh ha ki katto katne ki bynta jong ka jylla West Bengal. Ka mat trei kam kaba hakhmat eh jong ka KLO ka dei ban ïoh ïa la ka jong ka jylla kaba la tip kyrteng kum ka Kamtapur ka ban kynthup ïa ki katto katne ki bynta jong ka jylla Assam bad West Bengal. La seng ïa ka ha u snem 1995.
Ha ki snem kiba la leit noh, ki dkhot jong ka KLO ki la don bynta ha ki kam beaiñ ba bun jait, kunthup ruh ïa ki kam thombor pyrshah ïa ki bor pahara, kam pynbthei bom bad kumjuh ruh ha ki kam dawa pisa beaiñ. Na ka liang ka Sorkar India ka la kheiñ beaiñ ïa ka seng KLO kat kum ki kyndon kiba hapoh ka Unlawful Activities (Prevention) Act.
