Guwahati, Jylliew:
Ki bor sorkar jong ka jylla Assam ki la pyntip ba ha ka 4 tarik mynta u bnai kawei ka jingjia kaba sngewsih ka la jia ha ka shnong Bangalikuchi, Rangia, Kamrup district, na ba uwei u nongtrei jong ka Assam State Electricity Board (ASEB) u la duh ei ïa la ka jingim hadien ka jingshah bat bording ilektrik.
Utei u nongtrei ka ASEB u la shah bat ilektrik katba u dang leit ban maramot ïa uwei u waiar u ba don ha kawei ka karkhana. U nongtrei ka ASEB u ba la duh ei ïa la ka jong ka jingim na katei ka jingjia u dei u ba la tip kyrteng kum u Hamidur Rahman.
Hadien katei ka jingjia, la ïathuh ba na ka liang ki nongshong shnong kiba marjan ki la leit ban pynkit mar mar ïa u Hamidur sha kawei ka jaka sumar kaba marjan, hynrei u trei u nongtrei ka ASEB u la khlad noh hashwa ban ïoh ïa ki lad jingsumar kiba paka.
Kat kum ki jinglum jingtip la ïathuh ba katei ka jingjia shah bat bording ilektrik ka la jia namar ba utei u nongtrei ka ASEB u khlem pynlip ïa ka bording ha ka por ba u la leit ban maramot ïa uwei u waiar.
Kat kum ki jingïoh lum khubor la ïathuh ba ka jingjia shah bat bording jong u nongtrei ka ASEB ka dei ka sien kaba ar kaba la jia ha ki 2 bnai kiba la dep. Dang ha u bnai ba la dep, uwei u nongtrei jong ka ASEB u la duh ei ïa la ka jong ka jingim hadien ka jingjia shah bat bording ilektrik ha ka jingjia kaba la jia ha ka thaiñ Borkhola, Cachar district.
