Imphal, Nailur:
U Myntri Rangbah ka jylla Manipur, u Y Khemchand Singh, ha ka sngi Thohdieng, 4 tarik, Nailur, u la pynrem jur ïa ka jingshah kawang bom kawang kti ka ïing sah jong u K Meghachandra Singh, uba long u nongïalam ka seng Congress Legislature Party, ha Thoubal distrik, da kaba ong, yn ym shah ïa ki kam thombor pyrshah ïa ki nongmihkhmat ba la shah jied.
Kane ka jingbthei bom ka la jia hajan ka khyrdop jong ka ïingsah jong u Meghachandra ha Yairipok Bishnu Naha ha Wangkhem konstitwensi ha ka janmiet jong ka sngi Palei.
“Kum kine ki kam thombor ïa ki nongmihkhmat ba la shah jied ki long ki bym lah ban pdiang bad yn nym shah”, la ong u Khemchand. U Myntri Rangbah ka jylla u la bthah ïa ki pulit ban pynlong ïa ka jingtohkit kaba bniah bad ban pynthikna ba ïa kiba donkti yn pynngat ha ka aiñ kham kloi katba lah.
Ki pulit ki la ïathuh ba ki briew ki bym lah ban ithuh ki la pynmih ïa katei ka jingbthei bom ha ka por kumba 8.15 baje mynmiet hajan ka kynroh jong ka ïing sah jong u Meghachandra.Ym shym la don mano mano ba mynsaw ha katei ka jingjia, bad u Meghachandra um shym la don ha ïing ha ka por ba jia katei ka jingbthei bom, la ïathuh ki pulit.
