Imphal, Jylliew:
Ka Ministri jong ka tnat Kam Pohïing (MHA) jong ka Sorkar Pdeng ha ki khyndiat sngi kiba la leit noh ka la thaw da kawei ka komiti kaba kyrpang ka ban shimti ïa ki kam tohkit halor ki jingmih jong ki jingïakajia bad jingïaumsnam kiba la jia ha ka jylla Manipur naduh ka 3 tarik jong u bnai Jymmang.
Ïa katei ka komiti kaba don ïa 3 ngut ki dkhot la thaw da ka MHA ka ban ïalam khmat da u Chief Justice barim jong ka Gauhati high Court Ajai – Lamba. Kiwei kiwei ki dkhot jong katei ka komiti ki kynthup ïa u Himanshu Shekhar Das (ophisar IAS ba la shongthait) bad u Aloka Prabhakar (ophisar IPS ba la shongthait na ka kam).
Kum ban shu ïathuh hangne, dang shen na ka liang u Myntri ka tnat Kam Pohïing jong ka Sorkar Pdeng – Amit Shah u la pynbna ba ïa ki jingïakajia ha ka jylla Manipur yn tohkit da ka ‘judicial panel’.
Haba phai pat sha kiwei ki khubor la ïathuh ba watla na ka liang ki jingïakajia bad jingïaumsnam ha ka jylla Manipur ki la sdang ban thanda katba nang ïai mih ki sngi, pynban ha ka 4 tarik mynta u bnai la ïoh jingtip ba ki runar ki la leit ban wiang ding ïa ka ïing sah jong u MLA ka seng congress kaba don ha ka thaiñ Sugnu.
Ïa ka ïing sah jong u MLA ka seng Congress – RK Ranjit kaba don ha ka konstitwensi Sugnu la leit ban wiang ding da ki runar ha ka step phyrngab jong ka 4 tarik mynta u bnai.
Kat kum ki jingïoh lum khubor la ïathuh ba na ka liang ki runar ym tang ba ki la leit ban wiang ding ïa ka ïing sah jong u MLA, hynrei ki la wiang ding ruh ïa ki 2 tylli ki kali kiba la set ha phyllaw ïing jong utei u MLA ka Congress.
