Itanagar, Jylliew:
Ki bor pulit jong ka jylla Arunachal Pradesh ki la pyntip ba ha ka 6 tarik mynta u bnai ki la ïoh ban kem ïa 5 ngut ki runar kiba la donkti ha ka jingjia ïather kuli kaba la jia ha ka shnong Panbari, Dhemaji district jong ka jylla Assam. Ïa ka jingshah kem jong kitei ki 5 ngut, la pynbna paidbah bad pyntip ruh da u Myntri Rangbah jong ka jylla Arunachal Pradesh – Pema Khandu bad da u Director General of Police (DGP) jong ka jylla Assam – GP Singh.
Kat kum ka jingpyllait kyrwoh jong u Myntri Rangbah u la pyntip ba ïa 3 ngut ki runar la ïoh ban kem ha ka miet jong ka 5 tarik bad 2 ngut kiwei pat ki la shah kem ha ka step jong ka 6 tarik mynta u bnai. Na ka liang u Myntri Rangbah u la pynshai paidbah ruh ba ka jingjia ïather kuli kaba la jia ha ka shnong Panbari kam don satia ïa kano kano ka jingïadei bad ki kam ïakajia khappud hapdeng ka jylla assam bad Arunachal Pradesh; hynrei ka dei ka jingïakajia kaba hapdeng ki 2 tylli ki kynhun runar.
Kat kum ki jingïoh lum khubor la ïathuh ba ki runar kiba na kawei ka thaiñ khappud kaba hapdeng ka jylla Arunachal Pradesh bad Assam ki la donkti ban ther kuli pyrshah ïa 4 ngut ki briew kiba dang don bynta ha ki kam ban thung dieng ha shilliang pud jong ka jylla Assam.
Ha katei ka jingjia, la ïathuh ba ki la don 2 ngut napdeng kitei ki briew kiba la duh ei ïa la ki jong ki jingim bad 2 ngut kiwei pat kiba la ïoh ïa ki jingmynsaw kiba jur. Ki 2 ngut kiba la duh ei ïa la ki jong ki jingim na katei ka jingjia ki kynthup ïa u Boga Chutia bad u Monitu Gogoi. Kiba la ïoh pat ïa ki jingmynsaw ki kynthup ïa u Jagat Gogoi bad Puspa Gogoi.
Halor katei ka jingjia la ïathuh ba na ka liang ka tnat pulit jong ka jylla Arunachal Pradesh ka la pynrung da ka mokotduma (FIR no 11/23 u/s 147/148/149/302/201/34 r/w 25/27 arms act) ha Likabali PS.
Haba phai sha kawei pat ka khubor, na ka liang u DGP jong ka tnat pulit ka jylla Assam u la pyntip ba shen ka tnat pulit jong ka jylla Arunachal Pradesh kan sa wan ban aiti ïa kitei ki 5 ngut ki runar ha ki bor pulit jong ka jylla Assam.
U DGP u la pyntip shuh shuh ba na ka liang ka tnat pulit jong ka jylla Assam ruh ka la pynrung da ka mokotduma (63/23 u/s 147/148/302/326/307 IPC r/w 25 (1) (a)/27 (3) of arms act) ha – Gogamukh PS.
Ha kawei ka khubor pat, na ka liang ka sorkar Assam ka la pynbna ruh ba kan pynbiang da ka lad jingïarap kaba mar T.5 lak sha ki longïing jong kitei ki 2 ngut kiba la kyllon ïap. Na ka bynta kiba la ïoh ïa ki jingmynsaw, ka sorkar Assam ka la pynbna ruh ban pynbiang da ka lad jingïarap kaba mar T.1 lak.
