Guwahati, Jylliew:
Ïa ka mokotduma kaba ïadei bad ka jingkhlad jong ka sub-inspector ka tnat pulit jong ka jylla Assam – Junmoni Rabha yn sa leit ban aiti noh sha ka Central Bureau of Investigation na ka bynta ban pyndep ïa ki jingtohkit. Ïa katei la pynbna da u Director General of Police jong ka jylla Assam – GP Singh ha ka jingïalang bad ki lad pathai khubor ha ka 6 tarik ha Pathsala.
Kat kum ki jingïoh lum jingtip la ïathuh ba tad haduh kane ka kynti kaba mynta, ïa ka mokotduma kaba ïadei bad ka jingkhlad jong katei ka pulit SI la shimti ban tohkit da ka tnat Criminal Investigation Department (CID) jong ka tnat pulit Assam. La ïoh jingtip ruh ba dang ha ka 6 tarik mynta u bnai, na ka liang ka tnat CID ka ‘summon’ ruh ïa 2 ngut ki pulit ka jylla – Abhajyoti Rabha bad Rupjyoti Kalita ban kylli jingkylli na ka bynta katei ka jingkhlad jong ka pulit SI.
Kum ban shu ïathuh hangne, na ka liang ka Sumitra Rabha (kmie jong ka Junmoni Rabha) ha ka 19 tarik u Jymmang ka la leit ban pynrung da ka FIR halor katei ka jingkhlad jong ka khun jong ka. Ka Sumitra Rabha ka la leit ban pynrung ïa ka FIR ha Jakhalabandha PS, Nagaon district, Assam.
Ha ka FIR, na ka liang ka Sumitra Rabha ka la dawa ba dei ban pynlong da ka jingtohkit kaba bniah halor ka jingkhlad jong ka khun jong ka ha ka step jong ka 16 tarik u Jymmang, 2023. Na na ka liang ka Sumitra ka la kynnoh ruh ba ka jingkhlad jong ka khun jong ka ka dei na ka daw jong ka jingdon eiei kaba sha lyndet bad ka dei ka jingjia kaba la pynkhreh lypa da no re da no ban shim ïa ka jingim jong ka khun jong ka. Na ka liang ka Sumitra ka la pyntip ruh ba na ka liang ka jong ka, kam shym la pdiang satia ba ka khun jong ka ka la khlad na ka daw jong ka jingjia ïatakhuh kali.
