Guwahati, Jylliew:
Hadien ka jingmih jong ki jingïakajia bad jingïaumsnam kiba jur ha ka jylla Manipur la ïathuh ba tad haduh kane ka kynti kaba mynta ki la don palat 10,700 ngut ki nongshong shnong na Manipur kiba la leit ban wad jaka rieh ha ki bynta bapher bapher jong ka jylla Mizoram bad kumjuh ruh ha ki bynta ba shathie jong ka jylla Assam.
Kat kum ka jingïathuh jong ki heh sorkar ka jylla Mizoram, ki la pyntip ba ki la don haduh 9,501 ngut ki nong Manipur kiba la wan ban rieh tngen ha ki distrik bapher bapher jong ka jylla Mizoram bad 90% na kitei baroh ki la ïoh ïa ki jaka rieh ha ki 3 tylli ki distrik jong ka jylla – Aizawl, Kolasib bad Saitual district.
Ka thaiñ Kolasib district ka dei ka thaiñ kaba la lah ban pdiang ïa bun ngut tam ki paid Manipur (3,481 ngut), bud sa ka thaiñ Aizawl (3,157 ngut) bad ka thaiñ Saitual (2,390 ngut).
Kat kum ki jingïoh lum jingtip la ïathuh ba na ka liang ka sorkar Mizoram ka la thaw ruh da kawei ka komiti trei kam hapoh ka jingïalam jong u Myntri ka Tnat Kam Pohïing – Lalchamliana ban khmih bniah halor ki mat kiba ïadei bad ki jingeh jong kitei ki paid Manipur.
Kat kum ki jingïoh lum jingtip la ïathuh ba ha katei ka komiti la don bynta da ki nongïalam jong ka Young Mizo Association, Mizoram Journalists’ Association, Mizoram Kohhran Hruaitute Committee, ki nongïalam balang, bad ki Myntri jong ka sorkar jylla. La thaw ïa katei ka komiti hadien ka jingïoh ïa ka jingbthah na u Myntri Rangbah jong ka jylla – Zoramthanga.
Haba phai sha kawei ka liang pat, la ïathuh ba ki la don ruh haduh kumba 1,200 ngut ki paid Manipur kiba la hap ban mih noh na la ki jong ki ïing ki sem bad leit ban rieh tngen ha ki 12 tylli ki ïing dara kiba don ha ka thaiñ Cachar district jong ka jylla Assam. Ïa kitei ki paid Manipur la pynbiang ïa ka jaka sah jaka dem bad ïa ka bam ka dih da ka sorkar Assam.
Haba phai sha kawei pat ka khubor kaba ïadei bad ki jingïakajia ha ka jylla Manipur la ïathuh ba ha ka miet jong ka 5 bad 6 tarik mynta u bnai ka la don ka jingïasynreit kuli kaba jur hapdeng ki bor pahara bad ki kynhun kieng atiar. Ha katei ka jingjia, la ïathuh ba uwei u shipai ka Border Security Force (BSF) u la kyllon ïap bad 2 ngut kiwei pat ki shipai jong ka tnat Assam Rifles ki la ïoh ïa ki jingmynsaw.
Katei ka jingjia ka la jia ha ka thaiñ Serau. Ïa ki 2 ngut ki shipai ka Assam Rifles kiba la ïoh ïa ki jingmynsaw la leit ban pynkit noh mar mar sha Mantriphukhri ban ïoh ïa ki lad jingsumar kiba janai.
