Imphal, Jylliew:
Ki bor pahara ha ka 8 tarik mynta u bnai ki la leit ban pynbteng ïa ki jingkhynra ha ki thaiñ bapher bapher jong ka jylla Manipur bad hashwa ka jingleit khynra ïa ki thaiñ bapher bapher, ki la kyntu shwa ïa ki paidbah ba kin wan ban aiti hi da lade ïa ki tiar siat bad kiwei kiwei ki tiar pynmynsaw – khnang ban kan nym wanrah ïa kino kino ki jingjia kiba sngewsih.
Kat kum ki jingïoh lum khubor la ïathuh ba ïa ki jingleit khynra ha ki thaiñ ki bym shym la hap hapoh ka jingpyntreikam ïa ka AFSPA, la leit ban pynlong da ki bor pahara ha ryngkat ka jingdon lang jong ki majistor.
Ha katei ka jingleit khynra, na ka liang ki bor pahara ki la ïoh ban kurup ïa 35 tylli ki tiar siat bad kiwei kiwei ki tiar pynmynsaw. Ha ka jingleit khynra la khmih bad jurip bniah ruh ïa ka surok bah NH 37 na ka bynta ka suk ka saiñ ha ka leit ka wan jong ki kali kit mar bam bad kiwei kiwei ki mar ba ju donkam man la ka sngi.
Kat kum ka kyrwoh na ki bor pahara la ïathuh ba ïa ki jingleit khynra ha katei ka sngi la pynlong ha kata ka rukom ka ban nym wanrah ïa kino kino ki jingmynsaw ne pynthut ïa ka shong suk shong saiñ bad ka leit ka wan jong ki ‘riew paidbah.
