Imphal, Jylliew:
Ki bor sorkar ka Central Bureau of Investigation (CBI) ha ki khyndiat sngi kiba la leit noh ka la ïoh ban pynrung ïa 6 tylli ki mukotduma kiba ïadei bad ki jingkajia bad jingumsnam kiba la jia ha ka jylla Manipur naduh u bnai ba la dep.
La ïoh jingtip shuh shuh ba na ka liang ka CBI ka la dep ruh ban thaw ïa ka Special Investigation Team (SIT) ban tohkit halor ki jingkajia bad jingumsnam kiba la jia ha ka jylla Manipur naduh ka 3 tarik jong u bnai Jymmang. Ïa ka kynhun SIT ba la thaw da ka CBI yn ïalam khmat da u Deputy Inspector General (DIG) bad katei ka kynhun kan don ïa 10 ngut ki dkhot kiba na ka tnat CBI.
Kum ban shu ïathuh hangne, na ka liang u Myntri ka Tnat Kam Pohïing jong ka Sorkar Pdeng – Amit Shah ha ka jingwan jngoh jong u ïa ka jylla Manipur u la pynbna ba ïa ki kam tohkit halor ki jingkajia ha ka jylla Manipur yn shimti da ka CBI.
Na ki 6 tylli ki mukotduma kiba ka CBI ka la ïoh ban pynrung, 5 tylli ki dei ki mokotduma kiba ïadei bad ka ‘criminal conspiracy’, bad kawei pat kaba ïadei bad ka ‘general conspiracy’.
Kum ban shu ïathuh hangne, naduh ba ki jingïakajia ki la jia ha ka jylla Manipur ki la don jan 100 ngut ki briew kiba la duh ei ïa la ki jong ki jingim bad bun spah ngut kiba la ïoh ïa ki jingmynsaw. Ki la don ruh da ki phew hajar ngut ki briew kiba la hap ban mih jyndat noh na la ki jong ki ïing ki sem bad leit wad jaka rieh sha ki jylla kiba marjan kum ka jylla Mizoram bad Assam.
