Aizawl, Jylliew:
U Myntri Rangbah jong ka jylla Mizoram u ba dei ruh u nongïalam jong ka Mizo National Front (MNF) – Zoramthanga ha ki khyndiat sngi kiba la leit noh u la pynbna ba uwei na ki Myntri jong ka Sorkar Jylla un sa don bynta ban kynriah thaiñ noh bad ïakhun ïa ka ilekshon na kawei ka thaiñ kaba ka seng Congress ka khlaiñ. U Myntri u ban kynriah thaiñ u dei u Robert Romawia Royte u ban leit ban ïakhun noh ïa ka ilekhson na ka thaiñ Hachhek ha ka ilekshon Ïing Dorbar Thaw Aiñ jong ka jylla Mizoram ka ban sa pynlong ha une u snem ba mynta.
Ïa ka rai jong ka seng MNF, u Myntri Rangbah jong ka jylla u la pynbna ha kawei ka jingïalang jong ka seng kaba la pynlong ha ka shnong Zualnuam – Hachhek constituency, Mamit district.
Ha ka jingai jingkren jong u Myntri Rangbah u la pyntip ba ka komiti jied kyrtong jong ka seng ka la rai ba u Royte un nym don bynta shuh ban ïakhun ïa ka ilekshon na ka thaiñ Aizawl East II, hynrei un leit ban ïakhun noh ïa ka ilekshon na ka thaiñ Hachhek.
Ïa ka ilekshon sha ka Ïing Dorbar Thaw Aiñ jong ka jylla Mizoram la buh ban pynlong ha ki bnai ba khatduh jong une u snem ba mynta.
Kat kum ki jingïoh lum khubor la ïathuh ba u Royte ha ka ilekshon ka ban sa long un don bynta ban ïakhun pyrshah ïa u kyrtong ba radbah jong ka seng Congress – Lalrindika Ralte u ba dei u nongmihkhmat u ba pyrshah tam ïa ka seng MNF.
Tad haduh kane ka kynti kaba mynta, u Royte u dei u myntri ha ka sorkar MNF u ba bat ruh ïa bun tylli ki tnat sorkar jong ka jylla kynthup ïa ka tnat Ïalehkai bad ka tnat Jngohkai Pyrthei jong ka jylla Mizoram. U Royte u dei ruh uwei na ki Myntri u ba kynsai tam jong ka sorkar MNF hapoh ka jingïalam jong u Zoramthanga. Na ka liang u Zoramthanga u la pynpaw ruh ïa ka jingkyrmen kaba khraw ba ka seng ka jong u kan sa ïoh biang ïa ka lad ban synshar ïa ka jylla Mizoram hadien ka ilekshon. Ha ka Ïing Dorbar Thaw Aiñ ba mynta jong ka jylla Mizoram, ka MNF ka don ïa 28 ngut ki nongmihkhmat, ka seng Congress 6 ngut, bad uwei u nongmihkhmat jong ka seng BJP.
Watla ka MNF ka dei ka dkhot jong ka North East Democratic Alliance (NEDA) hapoh ka jingïalam jong ka seng BJP bad kumjuh ruh ka dkhot jong ka sorkar NDA, pynban ha ka jylla Mizoram kam shym la ïatreilang satia bad ka BJP.
