Itanagar, Jylliew:
Ki bor pulit jong ka jylla Arunachal Pradesh ha ka 11 tarik mynta u bnai ki la ïathuh ba haduh 4 ngut ki nongshong shnong ka jylla ki la duh ei ïa la ki jong ki jingim bad 5 ngut kiwei pat ki la ïoh ïa ki jingmynsaw kiba jur hadien ba ka kali kaba ki ïashong ka la kylla bad hap sha kawei ka riat bah kaba don marjan bad ka shnong Kemliko (shi lynter ka surok Godak – Raga), Kamle district jong ka jylla Arunachal Pradesh.
Ki 4 ngut ki briew kiba la khlad na katei ka jingjia ki kynthup ïa u Tagam Baja, Longku Tad, Yamen La, bad Saiful Islam. Kiba la ïoh ïa ki jingmynsaw ki kynthup ïa u Baja Yekir, Yugum Thapa, Ajit Tudu, Sagge Muri bad u nongñiah jong katei ka kali u ba la tip kyrteng kum u Pradeep Singh.
Kat kum ka jingïathuh jong ki bor pulit ki la pyntip ba ka kali kaba la hap sha katei ka riat ka dei ka kali Tata Sumo kaba dang thmu ban leit sha ka nongbah Itanagar na ka thaiñ Daporijo – headquarters jong ka thaiñ Upper Subansiri district.
Na ka liang u SP ka Kamle District – Taru Gusar u la pyntip ba katei ka jingjia ka la jia ha ka por kumba 9 baje eiei mynstep. U la ïathuh ba ïa kiba la mynsaw la leit ban pynkit sha ka District Hospital kaba don ha ka shnong Raga bad nangtei la leit ban pynkynriah sha kawei ka jaka sumar kaba don ha ka nongbah Itanagar na ka bynta ki lad jingsumar kiba kham paka.
