Shillong, Jylliew 18:
Ka jingdon jong ka jingpang at-snieh doh ha ki masi lane ka Lumpy Skin Disease (LSD) ka la ktah ïa ka khaïi ka pateng jong kiba bun ki nongshoh doh bad nongdie doh masi. Kumta na ka liang ka seng ki nongot doh ka Butcher Association of Meghalaya (BAM) ka la dawa na ka tnat ri jingri (Animal Husbandry and Veterinary) ka Sorkar Jylla bad ïa u Myntri u Bah A L Hek ban pynshai paidbah halor ka jinglong jingman jong kane ka jingpang khnang ba ki paidbah kin nym kulmar jingmut bad don jingtieng ban bam ïa ka doh masi.
Dang shen, na ka liang u Bah Hek um pat kren shai haduh katno kane ka jingpang LSD ka la ktah ïa ki masi ha kane ka Jylla, hynrei u la ong pynban ba ym pat don kano-kano ka jingkheiñ katno tylli ki masi kiba la pang bad ïap namar kane ka jingpang. U la ong ba u shu ïohsngew ba ki don ki masi kiba ïap ha Pynthorumkhrah hynrei ym pat don ka jingpynshisha.
Une u Myntri haduh kine ki sngi um pat kren shai shaphang ka LSD, hynrei u dang kham bunkam ban kren halor ka kaiphod jong ka Food Safety halor ka jingkhang ban wanrah dohkha na shabar Jylla namar la lap ba bun ki dohkha ki dei kiba khleh dawai ‘formalin’; kaba dei ka dawai kaba buh jingma ïa ka koit ka khiah ki briew.
Kane ka jingbym shai ki paidbah halor ka jinglong jingman ki masi ka la nang pynsyier ïa ki ban bam dohmasi bad ktah ruh ïa ki nongdie dohmasi bad ïa ki nongdie dud masi ruh kumjuh la ka dei kiba leit ai dud masi sha ïing briew ne ka dud masi ha ki dukan sha.
Na ka liang u Bah Esron Marweiñ, uba dei u nongïalam ka Butcher Association of Meghalaya u la ong ba hadien ba la wan lynshop ka jingpang LSD, kum ki nongdie dohmasi ki la mad jingeh namarba bun ki nongdie ki la hap ban khang dukan namar ka jinglong jingman jong ka ïew.
U la ong ba wat lada ka tnat ri jingri ka Sorkar Jylla ka la pynshai katto katne haba ïadei bad kane ka jingpang, hynrei kam ai pat kano kano ka kaiphod kaba pynshai bha khamtam ban ïathuh sha ki paidbah haduh katno la lah ban pynkoit ïa kane ka jingpang.
U la ong ba ka tnat ri jingri ka khlem pynshai ruh halor kane ka jingpang LSD la ka dei kaba lah ne em ban pynkoit khnang ba ki paidbah kin nym tieng bad kin hun ban bam ïa ka doh.
U Bah Esron u la ong ba haba ka Association ka la ïakynduh bad ki ophisar ka tnat ri jingri ban pan jingshai halor ka jinglong jingman kane ka jingpang khnang ban pynthikna ïa ka jingshngaiñ ban bam bad die ïa ka dohmasi, na ka liang u Joint Director ka tnat u la pynshai ba kane ka jingpang kan ym ktah eiei lada bam ïa ka doh.
Hynrei u la ong kane ka la nang pynkulmar shuh shuh namarba tang katto katne sngi, na ka liang u Secretary ka tnat ri jingri, u la phah pynmih sa kawei ka jingpynshai ba ym long ban bam ïa ka doh bad ka dud masi kiba la ngat ha kane ka jingpang.
“Kane ka jingpynbna ka tnat ka la wanrah pynban ïa ka jingduh jingshaniah na ka liang u paidbah ban thied bad bam ïa ka dohmasi bad ban dih ïa ka dud masi,” u la ong haba ïathuh ba na ka liang ka seng ka la wad ïa ki lad ki lynti kumno ban ïoh biang ka jingshaniah jong u piadbah ban bam ïa ka dohmasi.
Shuh shuh u Bah Esron u la ïathuh ba haduh mynta, ka Association kam pat ïoh khubor eiei kaba tikna halor kane.
Halor ka jingshah ktah ki nongdie dohmasi, u Bah Esron u la ïathuh ba ha ki por mynshwa, ka dukan kaba ju die uwei u masi, mynta tang 10 kilo ruh kam lah shuh ban die. Kane ka la pynlong ïa ki nongdie dohmasi ban sangeh shwa ïa ka jingdie doh namar la bun ka doh kaba sah.
Kumta u la kyrpad ïa ka tnat ri jingri ban pynshai paidbah halor ka jinglong jingman jong kane ka jingpang khnang ba ki paidbah ruh ki suk mynsiem ban thied ïa ka dohmasi namar haduh mynta man ka sngi ki la shu pynmih halor ka jinglong jingman jong ka jingpang.
Kane ka seng ka dawa ruh ïa u Myntri ban pynshai halor kane ka bynta namar kane ka la ktah ym tang ïa ki nongdie dohmasi hynrei wat ki dukan die ja die sha ruh ki la shahktah lang namar kim nud shuh ban shet dohmasi ha dukan namar ki nongbam ki don jingtieng.
