Shillong, Jymmang 05
Ka Shillong Lajong FC bad ka Janepih YSCA ki la lah ban pyntikna ïa lade ban bat ïa ki kyrdan ba hakhlieh ha la ki jong ki group jong ki, hadien ba ki la khur jingjop ki ha ka lympung ïalehkai 5th Meghalaya State League ha ka sngi Ba-ar.
Ha kane ka jingïa-khun jong ka Group-E kaba la long ha Wahïajer, ka Shillong Lajong ka la pynliem noh da 3-0 kol ïa ka Lamyrsiang SCC, katba ka Janepih ka la pynliem ïa ka A’chik SCO Rongjeng da 4-1 kol ha ka Group-G kaba la long h Williamnagar.
Ha kawei pat ka liang, ka Mawphu ka la pyntikna ïalade ban jam sha pre-quarter final hadien ba ka la lah ban ïakhaid da mar 1-1 kol bad ka Mawlum Tyrsad SCC, ha ka jingïakhun ka Group-B kaba la long ha madan MFA, Polo.
Ha ka jingïakhun jong ka Group-C, ka Laskeiñ S&CSC ka la pynliem noh ïa ka Lamin XI SCC da 5-3 kol ha Amlarem. Da kane ka jingjop, ka Laskeiñ ka la don ha ka kyrdan kaba ar, ha kaba kan hap ban ap pat ïa ka jingmih na ka jingïakhun ka ban long ha ka sngi Balang hapdeng ka Amlarem SC bad ka Mawlai SC.
Katba ka jingïakhun jong ka Group-F kaba la long ha Mairang, ka Umlakro ka la pynliem noh ïa ka Lawbah SC da 5-2 kol.
Ha ka jingïakhun ka Group-A kaba la long ha SSA Stadium, Polo, ka Mawshun ka la jop ïa ka Umkaber SCC da 6-1 kol bad ka la kiew sha ka kyrdan kaba lai. Kiwei pat ki artylli ki jingïa-khun ki la kut noh ha ka jingïakhaid, kaba nyngkong ka dei na ka jingïakhun jong ka Group-D ba la long ha Khliehriat hapdeng ka Ladthadlaboh SC bad ka Thangskai Tiger SC kiba la ïakhaid mar 2-2 kol.
Ha ka Group-H ka jingïakhun hapdeng ka Seng Samla Umdang Pyllun bad ka Mawlarshong SC ka la ïakhaid mar 2-2 kol.
