Shillong, Jylliew 29:
Ka H. Elias Memorial HSS, Umphyrnai Presbyterian SS, Shillong College Higher Education bad ka Assam Rifles Public School ki la jam sha ka semi final ha ka U-17 (boys) jong ka East Khasi Hills District Level Subroto Mukherjee Football Cup.
Ha ka jingïakhun quarter final kaba la long ha ka Sngi Palei ha madan Third Ground, Polo, ka H. Elias ka la pynliem noh ïa ka Phila Rapsang Memorial SS da 4-2 kol.
Wat la kine ki kynhun kim shym lah ban pynkhih jar ha ka kylla step, hynrei ka Phila Rapsang ka la ïoh pynkhih jar nyngkong eh lyngba u Kevin Donald Kharlukhi (61). Tang hadien 1 minit ka H. Elias ka la ïoh pynïakhaid kylla lyngba u Andy Khmah.
U Mewanshngaiñ Ryntathiang u la thep ïa ka kol ba ar na ka bynta ka Phila Rapsang ha ka minit kaba 63, hynrei hadien shi minit u Yohaan Benjabin u la pynïakhaid kylla na ka bynta ka H. Elias.
Ka H. Elias ka la pynbud biang sa ar kol lyngba u Badapbiang Lawai (65) bad u Stevenson Sungoh (66) na ka bynta ban khur syndon ïa ka jingjop.
Ha kawei ka jingïakhun, ka Umphyrnai Presbyterian ka la pynliem noh ïa ka Tyrsad HSS lyngba ka shi kol ba la thep da u Balamkupar Rynjah ha ka minit kaba 21.
Ka Shillong College HE ka la pynliem noh ïa ka Nongbsap SS da 4-3 kol. Ïa kine kol la thep da u Freelyson Tariang, u Evemmy Tariang, u Riborlang L. Lyngkhoi bad u Venelson Marboh, katba na ka Nongbsap la thep da u Charles Glosious Sawkmie, R. Kharpuri bad u F. Ryntathiang.
Ka Assam Rifles ka la pynliem noh ïa ka Sacred Heart Boys HSS lyngba ka tie-breaker da 4-3 kol.
Na ka Assam Rifles la thep da u Iminstar Mawlong, Thoudam Dilson Singh, Ratson Lingu bad u Lalbiakdika, katba na ka Sacred Heart la thep da u Balamphrang Wahlang, Aldasjohn Wanñiang bad u Esakial Dhar.
Kumta ka H. Elias Memorial HSS, Umphyrnai Presbyterian SS, Shillong College Higher Education bad ka Assam Rifles Public School kin pynkhreh ban ïakhun semi final ha ka Sngi Thohdieng ha kajuh ka jaka.
Haba phai sha ka U-17 ki kynthei, ki la don saw tylli ki kynhun ha kaba la rah ban pynïakhun beit sha ka semi final ka ban long mynta ka Sngi Thohdieng ha madan Third Ground, Polo. Kine ki kynthup ïa ka Ïewrynghep SS, Tyrsad H.S.S, Umpohliew Jingtip HSS bad ka H. Elias Memorial HSS, Shillong.
