Agartala, Jylliew:
Kum shi bynta ban lah ïakhun pyrshah ïa ka jingkhaïi drok, ki pulit jong ka Tripura ki la ïoh ban kem ïa arngut ki briew bad ïoh ruh ban kurup ïa u Heroin uba shong dor T. 3 klur.
Kumba la ïathuh da ki pulit jong ka Tripura, la ong ba ki pulit jong ka Dhalai distrik ki la ïohmad ïa ka jingjop hynnin ka sngi kum shi bynta na ka jingpyntreikam ban pyllait ïa ka jylla na u drok ba la tip kum ka ‘Mission to make Tripura drug-free’.
“Hadien ba la ïoh jingtip halor ka jingdon jong kine ki briew, hynnin ka step, ka kynhun jong ki pulit ka Ambasa, ka la pynlong ïa ka jingpynap shrip ha kaba ka la ïohbat ïa kawei ka kali kaba don ïa u Registration number TR-01BU 0234 (Mahindra, 4×4) ha lad Kamalpur Tri. Kane ka kali ka dei kaba la wan na Mizoram bad thmu ban leit sha Ambassa,” la ïathuh ka tyllong khubor.
Ha ka por ba la pynlong ïa ka jingkhmih bniah, la lap ïa 300 tylli ki synduk sabon kiba don ïa u Heroin uba 3.416 kilo. Kiba la shahkem ki dei kiba la tip kyrteng kum u Mahabul Alam (38) na Boxanagar bad u Piklu Bhowmik (38) na Krishna Kishore Nagar ha Bishalgarh.
“Ka la don ka jingbuh jingujor ha kaba ïadei bad ka jingjia hapoh ka NDPS Act, bad ka jingpyntreikam katkum ki kyndon kan sa ïai bteng,” la bynrap shuh shuh ka tyllong khubor.
