Srinagar, Naitung:
Kumba la sakhi, la ong ba ki jingthmu wan rungtuh jong ki bar ri ha ki bynta jong u Line of Control (LoC) ha Jammu & Kashmir ki la jur bha bad ki la don ruh kumba 12 ngut ki lehnoh kiba la taïar bha ïalade kiba la shah pynïap ha ki shipai ïada khappud ha ka por ba ki dang ïaleh ban khanglad ïa ka jingthmu rungtuh jong ki lehnoh ha ki phra sngi ba la leit.
Ka jingjur jong ka jingthmu rungtuh jong ki bar ri ka la sdang ha u Jymmang bad ka la ïai bteng haduh u Jylliew. Ki la don kumba san tylli ki jingthmu rungtuh ïa kiba la jia ha ki bynta jong u LoC ha Jammu & Kashmir ha une u bnai ba la lah. Na kine ki san tylli ki jingthmu rungtuh, lai tylli ki dei kiba la jia ha Kashmir (ar tylli ha Machil bad kawei pat ha Keran Sector) bad ar tylli ha ka distrik khappud ha Poonch kaba don ha ka thaiñ Jammu.
Ki shipai ha ka por ba ki la pynpulom ïa ka jingthmu rungtuh ki la ïoh ban siat ïap ïa kumba 14 ngut ki lehnoh, ha kaba 11 ngut ka la long ha Kashmir bad 3 ngut ha Poonch.
