Guwahati, Naitung:
Kum shi bynta ban phai khmat ha kaba ïadei bad ki kynrum kynram ba la mih bad dang bteng ha Manipur, u dkhot jong ka ïingdorbar na Nowgong konstitwensi ha Assam, u Pradyut Bordoloi u la kyntu ïa ki para dkhot ha ka ïingdorbar ba ki la dei ban ïasnohktilang na ka bynta ban buh ka jingdawa ban ïakren bad ïamir jingmut ha kaba ïadei bad ki jingïakynad ba la mih ha kane ka jylla.
Naduh ka 3 tarik, Jymmang, 2023, ka Manipur ka la shah ktah jur na ki jingïakynad bad ki jingïaumsnam, ka hok longbriew manbriew ka la shah ïuhroit bad ki la don ruh bun ki mynsiem briew kiba la duhnoh bad bun ruh kiba la phet shnong.
Ki jingïakynad bad ki jingshah thombor ki la nang jia, la ka long ha ka liang ki kynhun shipai, ki kynhun kieng atiar bad kiba bun kiwei pat ki kynhun.
Kane ka jinglong jingman ka la ktah jur ïa ka rukom im jong ki nongshong shnong ha kane ka jylla.
Naba ïa ka dorkar Lyiur yn sdang ha ka 20 tarik, Nairung, u Pradyut Bordoloi u la wer ïa baroh ki para dkhot ba kin ïaleh shitom ban dawa ha ka ban ïakren halor ki kynrum kynram kiba la mih ha Manipur.
