Nang pynjlan ka Manipur ban pynsangeh treikam ïa ka Internet ha ka sien kaba 12

Imphal, Naitung:

Naba ki jingïaumsnam ki dang ïai bteng ha Manipur haduh kine ki sngi, ka sorkar jylla ka la nang pynjlan shuh shuh ban pynsangeh treikam ïa ka Internet ha ka sien kaba 12 ka ban long haduh ka 5 tarik, Naitung. Kane ka long kum shi bynta ban lah tehlakam ïa ka jingsaphriang jong ki khubor hamsaïa, ki video, ki dur bad ki jingthoh, ki ban lah ban nang pynjur ïa ki jingïakynad ha ka jylla.

U Home Department Commissioner jong ka Manipur u T. Ranjit Singh, ha ka jingthoh kaba u la phah, u la ong ba khnang ban ïakhun pyrshah halor ki jing-leh jingkam jong ki riewbymman kiba pyrshah ri bad ïa ka imlang sahlang bad ban wanrah ïa ka jingsuk jingsaiñ hapoh ka thaiñ la ïohi ba la donkam ban shim ki sienjam kiba tyngeh na ka bynta ban pynbiang ïa ki jinglong jingman.

Ka Manipur High Court ha ka taïew ba la lah, ka la hukum ïa ki heh ba dei khmih jong ka jylla ba ki la dei ban pynbiang ka jingtreikam jong ka Internet na ka bynta ki paidbah ha ki katto katne tylli ki jaka ba la jied kiba hap hapoh ka jingkhmih jong ki.

Kane ka hukum jong ka, ka la long naba la ïoh ïa ka jingmudui Public Interest Litigation ba la phah da kiba bun ki riewpaidbah.