Guwahati, Naitung:
Ha kaba ïadei bad ka jingpyntreikam kaba dang shen, ka ïingbishar jong u Special Judge ha ka sngi Ba-ar ka la kyntait ban ai jamin sha baroh 6 ngut ki briew kiba la shah kynnoh donkti ha ka kam bamsap kaba la kot sha ka T. 105 klur na ka State Council of Educational Research and Training (SCERT) ha Assam. Ïa kine kiba la shah kynnoh bamsap la tip kyrteng kum u Hunmoni Nath, Bhaskar Hazarika, Manoj Das, David Adhikary, Benin Doley, bad u Rajesh Kumar Joshi, kine ki la phah ïa ka jingkyrpad jamin hynrei na ka liang ka ïingbishar kam shym la pdiang.
Hashwa kane, kata ha ka 1 tarik, Jyliew, u dkhot ba pawkhmat jong ka seng Aam Aadmi Party (AAP), u Bidyut Kalita, u la shah weng noh na ka seng halor ka jingshah pynshisha jong u ba u la donkti ha kajuh ka kam bamsap kaba la mih na ka SCERT. Ka seng khlem da pynslem ka la shim ïa ki sienjam na ka bynta ban pyntreikam shakhmat ha kaba ïadei bad ka jingpynshitom ïa une u dkhot ka seng uba la donkti ha ka kam bamsap u Kalita da kaba weng kam shipor na ka kam kaba u la bat hapoh ka seng.
U Bidyut Kalita, u dei u nongshong shnong jong ka Mirza, une u la shah khot hajir ha ka kynhun Special Vigilance Cell (CM’s SVC) jong ki Myntri Rangbah ha kaba ïadei bad ka jingdonkti ha ka kam bamsap. Ha kaba ïadei bad kane, ka la paw pyrthei ba u la ïaleh ban lait na ka jingshahkem naduh ba u la ïoh shithi, namar u tieng ba ïoh u shahkem.
