Shillong, Risaw 29
Ka lympung ïalehkai 1st Division Football League ba la pynïaid da ka Tyrsad Area Sports Association (TASA) ka la nangjam shaphrang ha kaba ka Nongmadan SC bad ka Umkseh SC ki la khur jingjop ha ka sngi Palei.
Ha kane ka jingïakhun kaba la long ha madan Mawlum Tyrsad, ka Nongmadan ka la pynliem noh ïa ka Mawdngong SC da 1-0 kol bad ïa kane la thep da u Kyrmenskhem Nongbet ha ka mint kaba 72.
Haba phai sha kawei pat ka jingïalehkai kaba ar, ka Umkseh SC ka la jop da 2-1 kol ïa ka Umkaber SC.
Ka Umkseh ka la pynkhih jar nyngkong eh lyngba u Auterky Eric Kharlyngdoh (65) bad ïa kawei pat la thep lyngba ka penalty ba la shut da u Dibasster Rani (70). Ka Umkaber ka la lah ban pynphai kylla shi kol lyngba u Ïaipynbiang Marbaniang (90+2).
Kane ka lympung kan bteng biang ha ka 2 tarik u Naiwieng hapdeng ka Mawponghong SC pyrshah ïa ka Mawsawrit SC ha ka por 12:30 mynsngi bad ka Mawlum Tyrsad SC ïa ka Nongmadan SC ha ka por 2:30 nohphai sngi.
