Jowai, Risaw 29
Ka Mookyndur SC ka la pynliem ïa ka Nongkhroh Rim SC da 2-0 kol na ka bynta ban khur jingjop ha ka Super Division ba la pynïaid da ka Thadlaskeiñ Sports Association (TSA) ha ka sngi Palei ha Multi Sports Complex kaba ha Wahïajer.
Ha kane ka jingïakhun ka Mookyndur ka la ïakhun tyngeh naduh kaba sdang ha kaba ka la thep mar shi kol ha ka kylla step bad kylla miet. Ïa ka kol ba nyngkong la thep da u Samehi Suting (4) bad kawei pat da u Monday Nelson Lamare (90+4).
Haba phai sha ka jingïalehkai jong ka 1st Division, ka Umjalasiaw SC ka la jop da 3-0 kol ïa ka Niriang SC. Ïa kine la thep da u Hunlang Siangshai (38), Lemiki Dkhar (42) bad u Ebanskhem Nongtdeh (59).
