I. R. Dkhar
Kane ka Ropeway Projek ka la pynkhihwin shisha ïa ngi ki paidbah nongshong shnong ha kjat jong u Lum Shyllong. Ka Sorkar lyngba ka Tourism Department, Forest Department bad ki Rangbah Shnong jong ka Raid Laban, ki la dep ai ïa ka No Objection Certificate (NOC), ong ki khubor. Bad ka jingpyntreikam da kita ki kynhun nongshna ne ki Agency, kiba shna ïa ka Ropeway, ki la sdang ïa ka kam, ong shuh shuh ki khubor jingtip. Hadien ba la ioh ïa ka jingmynjur ne ki NOC na ki bor Sorkar bad ki Rangbah Shnong, la ong ba ki kam ki la ïaid shakhmat. Ïa kane ka jingthmu jong ka Sorkar, la dep ioh ïa ka jingmynjur naduh u snem 2022, ong ki Rangbah Seng Saiñ Pyrthei. Dei ha kine ki 4 snem ba la wanrah ïa kane ka jingthaw ïa ka Ropeway projek, la iohi bad ioh jingtip ba ka jingpyntrei da kita ki nongshna, la sdang mynta. Ka jingkylli mynta ka long, balei naduh u snem 2022, ym jingïakhih eiei da ki rangbah, longkmie, nongshong shnong bad kiwei kiwei. Ka Sorkar ka la dep plan ïa kane ka Ropeway, balei ym don ka jingpyrkhat ha kine ki 4 snem shuwa ban pyntrei ïa ka ? Kiei kiei baroh, ki long namar ym don ka jingpyrkhat lypa, aiu kan jia ïa ka um ka wah, ïa ki dieng ki siej, ïa ka mariang sawdong sawkun shuwa ban thmu ban leh ïa ka kam. Ka Sorkar kam lah ban shu leh da ka bor, khlem da ioh ïa ka jingmynjur jong ki nongïalam shnong bad ki paidbah. Ynda haba la sdang ïa ka kam, mih ka jingpyrshah. Kane ka pynpyrkhat bad pynlynga ïa ngi ki nongshnong shnong jong u Lum Shyllong bad ha kjat jong u Lum Shyllong. Mynta ha kine ki sngi, mih ka Joint Action Committee (JAC) ban pynshah ïa ka jingpyntrei ïa kane ka Ropeway Projek. Ka jingkylli ka long, balei kim pyrshah ha kitei ki snem ba la don ka jingthmu ban wanrah ïa ka Ropeway projek ? Jin ki da la pyrshah ha katei ka por, kane ka ropeway projek kan jin da la sdang ban long.
Ka jingïakhih ban pyrshah da ka JAC ha kane ka por kan dang treikam ne em. Kane ka JAC kaba kynthup ïa ki longkmie bad ki rangbah riewpyrkhat kiba shong ha sawdong jong ka Laban, ka la dei ban kynthup lang ïa ka ki shnong baroh kiba don ha sor Shillong. Ka dei ban long ym tang ïa ka Malki, Laban, Lawsohtun, Kench’s GTrace hynrei ka dei ban long ïa ki shnong jong ka Sor Shillong baroh kawei. Ka daw, ba ka JAC ka ong, ka ktah shisha ïa ki tyllong um kaba kyrshoi na u Lum Shyllong. Ka daw ka long ba ïa ki dieng kiba kynshai bad na kaba ka um ka kyrsoi na kito ki dieng ki siej kiba don ha u Lum Shillong, ka long ka jingbsa ïa ka um bam um dih jong ka Sor Shillong baroh kawei. Lada ka JAC ka ioh ïa ka sur jong ka sor Shillong baroh kawei, hangta kan lah ba ka Sorkar kan pynsangeh noh ia kane ka Ropeway Projek.
Kane ka Ropeway projek, ki ong ba kan khring ïa ki nongwan jngohkai pyrthei ne ki tourist na kylleng ka ri India bad nabar ruh. La ong ba kan ai kam ai jam ïa ki samla jong kane ka Jylla Meghalaya.Kane ki ong ba kan wanrah ïa ka Development. Hynrei dei ban pyrkhat ba ka jingwan wah ïa ka development kam dei ban ktah ïa ka iap ka im jong u paid nongshong shnong, ïa ka ma-riang bad ïa ka jaitbynriew. Kane ka Ropeway projek, kumba la ïa ong, kan ktah shisha ïa ka umbam umdih, namar ka um ka mih na ka jingdon ki dieng ki siej. Shisien ba la pynthut ïa ka um, ka um kan jah noh. Ha ka por ba ngi dang rit, ngi ju ioh ïa ki umpohliew namar u slap u jur bha ha ki por mynshuwa. Tang shu la pynthut, kum ka jingkhynra ïa ka tyllong, ka um ka jah noh. Kumjuh, lada khynra ïa ka um, da ka jingpom noh ïa ki dieng, ka um kan jah noh. Namarkata, ka JAC ka la dei, nga shu ai jingmut, ba ki dei ban ïakhih bad ka Sorkar bad ki Synjuk ki Rangbah Shnong, ba ka Sorkar kan pynkynriah noh ïa kane ka ropeway projek noh shawei pat. Ki dieng kiba la dep pom, la dei ban thung biang da kiwei. Wat lada ka pateng kaba mynta kam doh shuh, hynrei kan long ka jingmyntoi ïa ka pateng ka ban wan bad ki longdien mandien.
