Imphal, Nailar:
Ki pulit jong ka Manipur ki la weng kam ïa san ngut ki pulit kynthup ïa u Station Incharge jong ka thaiñ ha kaba la jia ka jingshah pynïaid lyngkhuit jong arngut ki kynthei ha ka kynhun jong u paidbhur kaba la jia ha ka 4 tarik, Jymmang, la ïathuh ki heh pulit.
Ki heh pulit ki la ïathuh ba ym slem hadien ba la saphriang ka Video jong katei ka jingjia ha ka 19 tarik, Naitung, ki pulit jong ka Manipur ki la rai ban weng kam noh ïa u Station in-charge jong ka jaka treikam ki pulit ha Nongpok Sekmai kaba don ha Thoubal distrik lem bad ïa saw ngut kiwei pat ki pulit.
Ïa ka jingpyntreikam la leh ha ka por ba biang wat lada ki la don ki jingïakhih kiba man ka sngi da ki katto katne ki kynhun jait bynriew kiba na ka kynhun bun paid halor ka jingdawa ban pynphai biang ïa ki sha ka jaka ba ki wan, ki la ïathuh shuh shuh.
Ki pulit jong ka jylla ki la hukum ruh ha ka por ba biang ban pynlong ïa ka jingtohkit hapoh ka jingkhmih jong u Inspector General of Police na ka bynta ban wad ïa ki jingshisha baroh halor ka jingjia, kaba la pynlong ruh ïa ka jingshah lute jong ki tiar siat na ka almari jong ka jaka treikam ki pulit kaba la jia ha ka 3 tarik, Nailar ha Bishnupur, ki la ong.
