Imphal, Nailar:
Ki shipai ïada khappud haba ïai bteng ban pynlong ka jingkhynra bad thwet sha kylleng ki jaka ki la lap ïa ki tiar siat kiba la shah lute naduh u bnai Jymmang, kiba kynthup ïa 16 tylli ki tiar siat kiba kham jynjar ban pyndonkam, 70 song ki kuli ïasiat ha ka sngi Saitjaiñ ha Imphal -East, Imphal-West, bad Kangpokpi distrik jong ka Manipur, la ïathuh u heh pulit.
Kumba la ïathuh u heh pulit, la ong ba na ka jingpyntreikam halor ka jingleit wad ïa ki tiar siat ba la shah lute ha baroh ar tylli ki thaiñ kata ha ki thaiñ ba long lum bad ba long them, ka jingleit khynra ïa ki kali kiba ïaid ha surok ka dang ïai bteng ha ka jylla kaba la shah ktah jur na ka jingïakynad.
Ki la don baroh kumba 127 tylli ki Checkpoint ba la buh ha kiba bun ki distrik jong ka Manipur na ka bynta ban khmih bniah ïa ka jingrung bad ka jingmih jong ki kali bad kiwei pat ki jingleh jingkam jong ki bor ba pyrshah, katba 2257 ngut ki briew ki la shahkem ha kaba ïadei bad ki jingjia jong ki jingïakynad ha kaba ki la shah pynngat ha kiba bun ki kyndon bad katkum ki jingbthah jong ka sorkar ha kiba bun ki distrik jong ka jylla.
