Imphal, Nailar:
Ki la don kumba saw ngut ki lehnoh kiba dei na ki kynhun lehnoh bapher bapher kiba la shahkem ha ki jingleit khynra bad la ïoh ruh ban kurup na ki ïa ki tiar siat bad ki kuli, la ïathuh ki pulit hynnin ka sngi.
Ha ka por ba la pynlong ïa ka jingpyntreikam, ka kynhun jong ki pulit ka la ïoh ban kem ïa uwei u dkhot jong ka kynhun lehnoh NSCN(IM) bad uwei pat jong ka People’s Liberation Army (PLA), bad arngut ki nongïarap jong ki lehnoh Kangleipak Communist Party (KCP) (Lamyanba Khuman faction) na Imphal East bad Bishnupur distrik, la ong ka jingthoh jong ki pulit.
La ïoh ban kurup ïa kumba hynriew tylli ki tiar siat, san tylli ki kuli bad ar tylli ki tiar pynbthei na ki ha ka por ba la pynlong ïa ka jingkhmih bniah, la ïathuh ka jingthoh ba la phah da ki pulit. Ïa ka jingleit khynra la pynlong da ki shipai ïada ri ha ki jaka khappud bad ha ki jaka kiba kham ap jingma jong san tylli ki distrik, la ïathuh ka jingthoh.
Ïa ka jingïaid jong ki kali ha ki bynta jong ka surokbah National Highway 37 (Imphal-Silchar Road) la pyntreikam pyrkhing ha ki thaiñ kiba kham ap jingma bad kham duna ki bor pahara, la ïathuh shuh shuh ka jingthoh.
Ki la don baroh kumba 129 tylli ki Checkpoint ba la buh ha kiba bun ki distrik kiba don ha ki jaka lum bad ki jaka them bad 2,027 ngut ki briew ki la shahkem haduh mynta halor ka jingdonkti jong ki ha ki jingïakynad, la ong ka jingthoh.
