Aizawl, Nailar:
Ka ïingbishar bakyrpang jong ka Champhai, ha Mizoram ka la rai pynrem ïa uwei u briew uba la 30 snem ka rta ban set 20 snem ha patok halor ka jingjrong-kti bad leh kynshleiñ ïa kawei ka heprit. U Special Judge ka POCSO Act u Sylvie Zomuanpuii Ralte u la rai pynrem ïa une u runar ïa uba la tip kyrteng kum u Vanhreluaia bad rai pynshitom ïa u da kaba set 20 snem ha patok.
Ka ïingbishar ka la daiñ kuna ruh da kumba T. 10,000 pyrshah ïa une u nongleh bymman bad da ka jingbymlah ban siew jong u sa ïa kawei pat ka kuna u la hap ban shong tam sa ar snem ha patok.
Kumba la ïathuh ka tyllong khubor, la ong ba u Vanhreluaia u la rah ïa ka khynnah kaba dang 5 snem na ka ïingsah jong ka kaba don ha Champhai bad leh ïa katei ka kam jakhlia pyrshah ïa ka.
Kane ka jingjia ka la jia ha u snem 2019 ha kawei ka shnong kaba don ha Champhai jong ka bynta ba shaphang Mihngi jong ka Mizoram hajan khappud Myanmar.
Ki paralok jong kane ka heprit ki la mudui sha ki pulit halor kane ka jingjia ha kaba hadien kane u Vanhreluaia u la shahkem noh.
