Imphal, Nailar:
Arngut ki briew kiba kynthup uwei na ka kynhun jaitbynriew Kuki bad uwei na ka jaitbynriew Meitei, ki la duh ïala kajong ka jingim bad phra ngut kiwei pat ki la mynsaw na ka jingdei kuli haba la mih ka jingïasiat, kine ki kynthup ïa kawei ka longkmie bad u nongrep.
Ka jingïasiat kaba markylliang ka la long hapdeng ki nongpynïaid shnong jong ar tylli ki kynhun ha kaba kane ka la sdang naduh ka por 6 baje jong ka step sngi Ba-ar, kane ka jingjia ka la jia wat lada dang treikam ka jingpahara ki Commando jong ki pulit ka Manipur bad ki shipai ka sorkar kmie ha ki thaiñ kiba la kham ap jingma na ki jingïakynad.
Kane ka jingjia ka la jia khyndiat kynta hashwa ban pynlong ïa ka dorbar ha State Assembly kaba long ha ka sngi Ba-ar. U Laibungjam Inao, 27 snem ka rta uba dei u Meitei, bad u Jangminlen Gangte, uba dei na ka kynhun jait bynriew Kuki, ki la shah pynïap ha ka jingïasiat kaba markylliang kaba la jia ha Naransena.
Ki phra ngut kiba la mynsaw na ka jingjia ki kynthup ïa u nongrep ba la tip kyrteng kum u Salam Jotin, 38 snem ka rta bad kawei ka longkmie.
U Laibungjam Inao, uba dei u nongshong shnong jong ka Takheul u la ïap ha ka lynti ban pynpoi ïa u sha ka jaka ai jingsumar ha Imphal haba u la mynsaw na ki bynta jong ka khlieh.
Katba u Gangte, uba dei u nongshong shnong jong ka Songbo u la ïap hashen ha ka jingjia. Ki la don palat 160 ngut ki briew kiba la duh ïala kajong ka jingim bad kiba bun kiwei pat ki la mynsaw naduh ba la sdang ka jingïakynad ha Manipur ha ka 3 tarik, Jymmang.
