Aizawl, Nailar:
Sa ha kawei pat ka jinglah ban pyntreikam bad ïai buddien, ki shipai jong ka tnat Assam Rifles bad ka Custom Department ki la ïoh ban kurup ïa kumba 27 synduk ki sikret ba pynmih na bar ri, 3 synduk ka Beer bad 18 synduk ka Wine ba la shongdor da kumba T. 35.92 lak ha Champhai distrik ha ka 29 tarik, Nailar, 2023.
Ïa ka jingpyntreikam la pynlong ha ryngkat ka jingïatreilang hapdeng ki shipai ka tnat Assam Rifles bad ka Custom Preventive Force Champhai hadien ba la ïoh jingtip halor ka jingdon jong kitei ki mar. Ïa kine ki mar la buhrieh ha lynti jong ka Gen Area Iron Bridge. Ïa baroh kine ki mar ba la ïoh ban kurup kiba kynthup ïa ki sikret bad ka kyiad kaba la kot sha ka T. 35,92,800, la aiti sha ka Custom Preventive Force Champhai na ka bynta ban leh ïa kaba donkam.
