Guwahati, Nailar:
Na ka jingnang bteng ïa ka jingkhmih bniah ha kaba ïadei bad ka jingshlei um ha ka jylla Assam kaba dang bteng haduh mynta, kata haduh ka 29 tarik, Nailar la ong ba haba la lum jingkheiñ ki la don palat 3 lak ngut ki briew kiba la shah ktah na ka jingshlei um ha ki 21 tylli ki distrik jong ka jylla, la ïathuh ka tyllong khubor.
Kiba bun ki wah, kynthup ka wah Brahmaputra, ki la ïai bteng ban tuid bad shlei haduh u dak uba buh jingma ha kiba bun ki bynta jong ka jylla. Ka tyllong khubor kaba la wan na ka Assam State Disaster Management Authority (ASDMA) ka la ong ba na ka jingnang ïoh jingkheiñ hadien ba la dep ban pynlong ïa ka jingleit jurip bniah, la ong ba ka jingdon jong ki distrik kiba la shah ktah na ka jingshlei um ka la kiew sha ki 21 tylli na ki 17 tylli kiba la shah ktah hashwa.
Ka jingshlei um ka la ktah ïa kumba 3,07,489, ngut ki briew ha kaba ka Lakhimpur distrik ka la paw ba ka la long ka bynta kaba la shah ktah jur naba ki la don kumba 71,889 ngut ki briew kiba la ïakynduh jingeh na ka jingshlei um. Kiwei pat ki distrik kiba la shah ktah jur ki kynthup ïa ka Majuli ha kaba ki la don kumba 47,163 ngut ki briew kiba la shah ktah bad ka Golaghat ha kaba ki la don kumba 40,921ngut ki nongshong shnong kiba la shah ktah jur. Ka jingdon jong ki briew kiba la ïap na ka jingshlei um ka la neh 15 ngut.
Ki la don baroh kumba 698 ngut ki briew kiba la pynlong jaka sah ha ki saw tylli ki jaka sah ba shipor, katba ki la don kumba 87 tylli ki jaka sam ïa ki jingdonkam ba manla ka sngi sha ki lanot. Ki bor sorkar ha ka thaiñ bad ki pulit jong ka kynhun SDRF ki la shah pyntreikam ha kiba bun ki thaiñ na ka bynta ban ai jingïarap bad pyllait im ïa ki briew na ka jingshlei um.
