Imphal, Nailur:
Ka jingïasiat hapdeng ki shipai ïada ri bad ki ‘riew kieng atiar ka la jia ha ka thaiñ Pallel jong ka Tengnoupal distrik jong ka Manipur naduh ka step jong ka sngi Thohdieng, la ïathuh ki heh pulit. Kumba la ïathuh la ong ba ka jingsiat ka la sdang ha ka por 6 baje mynstep bad ka la ïai bteng. Haduh ba la thoh ïa ka khubor ym pat ïoh jingtip ban don ki briew kiba la ïap ne mynsaw na ka jingïasiat, la ïathuh shuh shuh ki pulit.
Ki shipai ïada ri ki la ïaleh katba lah ban tehlakam halor kane ka jingjia. Kane ka jingïasiat ka la jia ar sngi hadien ba ka la don ka jingïakhih ba la ïalum da ki hajar ngut ki nongïakhih ha Phougakchao Ikhai kaba don ha Bishnupur distrik, ha ka sngi Balang bad pyrshang ban tur pyrshah ïa ki jingker ba la pynap da ki shipai halor ka jingthmu jong ki ban leit sha ki ïing jong ki kiba la shu ieh ha Torbung.
