Nongpoh, Nailur 19
Kawei ka samla kaba dang hapoh 18 snem ka rta, ka la duh noh ïa la ka jingim hadien ba la kynnoh ba ka la kynthih na kawei ka kali kamai Auto Rickshaw kaba don ïa u number ML10-B-7675 ha ki bynta jong ka 17 Mer Byrnihat jong ka surok bah National Highway 6.
Kumba la ïoh lum jingtip na ki pulit, la ïathuh ba ïa katei ka jingjia la pyntip sha ki pulit ka thanat Byrnihat ha ka por 12:16 shiteng sngi eiei da ki bor pynïaid ka Byrnihat Primary Health Center (PHC). Mar kumta hi, na ka liang ki pulit ki la hiar sha katei ka PHC ban pynlong ïa ka jingtohkit.
Katkum ka jingtohkit jong ki pulit, la ïoh jingtip ba katei ka khynnah samla ka la shong da katei ka kali kamai auto rickshaw kaba la ñiah da u Ramalson Marak, 44 snem ka rta, na ki thaiñ Byrnihat ban leit sha 18 Mer. Katkum ka jingphla jong utei u nongñiah, la ïathuh ba katei ka khynnah, ynda poi ha ki bynta jong ka 17 Mer, ka la kynthih najrong katei ka auto rickshaw kaba dang ïaid kaba la pynlong ïa ka ban mynsaw jur.
Hadien katei ka jingjia, ïa katei ka khynnah la pynkit noh mar-mar sha Byrnihat PHC ban pynïoh ïa ka jingsumar, hynrei namar ka jingjur jong ka jingmynsaw, ki doktor katei PHC ki la ai jingmut ban phah sumar noh shawei. Kumta la pynkit noh sha ka Gauhati Medical College (GMC) da ka 108 kaba la synran lang da ki pulit na ka thanat Byrnihat.
Namar ka jingjur jong ka jingmynsaw, katei ka khynnah kaba la ngat ha katei ka apot ka la khlad hapdeng ka jingsumar hapoh GMC Hospital ha ka nongbah Guwahati. Halor kane ka jingjia, na ka liang ki pulit ki dang pynlong ïa ka jingtohkit kaba jur ban lap ïa ka jingshisha halor katei ka jingjia kaba la wanrah ïa ka jingduh noh ïa kawei ka mynsiew briew.
