Patna, Jylliew:
U Myntri uba dei khmih ïa ka tnad Railway u Ashwini Vaishnaw u la ong ba ka sorkar pdeng ka la mang ïa ka mang tyngka kaba heh tam kaba palat T.10,000 klur na ka bynta ban pynroi ïa ki jingtei na ka bynta ki rel ha Bihar ha u snem ka mang tyngka 2026-27.
U Vaishnaw ha ka jingleit jngoh jong u kaba shi sngi kata ha ka sngi Thohdieng sha ka jylla Bihar u la pynher lama bad pyllait paidbah ïa ka Chapra-Delhi (Anand Vihar) Express, ka Mau-Delhi (Anand Vihar) Express bad ka jingpynjlan ïa ka jingshakri ka rel Doohri Ghat-Aunrihar MEMU haduh Varanasi ha Saran.
U Myntri Rangbah ka jylla u Samrat Choudhary u la don lang ha kane ka sngi, katba u Myntri ka Uttar Pradesh u AK Sharma u la ïadonlang ha kane ka sngi lyngba ka durkhih.
Haba kren ha ka jingïalang ha Saran, u Vaishnaw u la ong ba dang shna sa san tylli ki jaka ïaid rel ha ka lad ba dei ïaid ki rel ha Patna ban pynbun ïa ka jingkit ki nongleit nongwan. Ka steshon rel Fatuha kaba don hajan Patna ruh ka dang ïaid shakhmat, u la bynrap.
U Vaishnaw u la bynrap ba ha kine ki 12 snem ba la leit hapoh ka jingïalam jong u Myntri Rangbahduh ka ri u Narendra Modi, ki la don baroh kumba 2,034 Km ki lynti rel ïa kiba la dep ban buh bad shna ha Bihar. “Ka jingpynïasoh da ki rel bullet na Delhi sha Lucknow, na Lucknow sha Varanasi, Varanasi sha Patna bad na Patna sha Siliguri yn sdang noh ha ki snem ban wan, ka por leit jingleit na Delhi sha Patna yn pynduna noh tang 4 kynta 41 minit ynda la sdang treikam ka rel bullet,” u la pyntip.
Nalor kane, ka sorkar pdeng ka thmu ruh ban pynrung 200 tylli ki rel thymmai na ka bynta ka jylla ha kine ki hynñiew haduh phra snem ban wan, u la pynpaw.
