Bhubaneswar, Jylliew:
Ka Odisha ka la rung sha ka bynta kaba thymmai jong ka jingroi bad jingkylla da ka jingplie bad jingbuh nongrim ïa ki kam pynroi kiba la kot sha palat T.47,600 klur da u Myntri Rangbahduh ka ri u Narendra Modi ha ka jingdon ryngkat jong ka President ka Ri India, ka Droupadi Murmu.
Hapoh ka jingïalam jong u Myntri Rangbah ka jylla u Mohan Charan Majhi, ka jylla ka nang kiew stet kum kawei na ki jaka ba don jingkyrmen bha ha ka ri India na ka bynta ka jingbei tyngka, ki jingtei, bad ki jingpynmih jingmut thymmai.
Ki projek ki kynthup ïa ki bynta ba kongsan kynthup ïa ka bor ding, ki lynti rel, ki surok, ka jingpynlang um, ka koit ka khiah, ka pule puthi, bad ki jingtei ha ka imlang sahlang, kaba buh ïa ka nongrim kaba skhem na ka bynta ka jingroi ka ïoh ka kot ha ka por ba jrong bad ka jingpynmih kam ha kylleng ka jylla.
U Myntri Rangbah ka jylla u Mohan Charan Majhi u la pynpaw ba ka jingthmu jong ka sorkar jong u kam dei tang ban tei ïa ki jingtei hynrei ban thaw ïa ki lad ki lynti kiba pynbha beit ïa ka jingim jong ki briew.
U la ban jur ba ka jingpynheh ïa ki karkhana, ki jingtei kiba mynta, bad ka jingkiew jong ki jingbei tyngka kan pynmih ïa ki lad kamai kiba heh hapoh ka Odisha, kaba pynduna shibun ïa ka jingwan buhai shnong bad kaba pynlah ïa ki samla ban tei ïa ka lawei jong ki ha ka jylla trai jong ki.
Napdeng ki jingthmu ba kongsan ba la pynpaw ki long ki projek pynmih bor ding kiba heh, ki kam pynïaid bun ki lynti rel, ki projek pynheh ïa ki surok bah, ki jingtei ban ai um, bad ki jaka ai jingshakri paidbah kiba mynta.
Kine ki jingbei tyngka la khmih lynti ba kin pynkhlaiñ ïa ka jingïadei, ban pynbha ïa ka jingmih, bad ban pynsted ïa ka jingroi jong ki karkhana ha kylleng ka Odisha.
Hapoh ka jingthmu jong ka sorkar Majhi, ka Odisha ka nang kylla long ka jaka ba la jied bha da ki nongbei tyngka napoh ri bad na ka pyrthei.
Ka jylla ka la sakhi ïa ka jingkhih kaba khlaiñ ha ki bynta kum ki kam shna tiar, ka bording, ka jingtih marpoh khyndew, ka jingpynpoi mar, bad ki jingshakri, kaba la thaw ïa ki lad ki lynti kiba thymmai na ka bynta ka jingroi ka ïoh ka kot bad ka jingthaw kam thaw jam.
Ka Odisha ka buh ruh ïalade kum ka jylla kaba la pynkhreh na ka bynta ka lawei da kaba bei tyngka ha ka jingstad thymmai, ka jinghikai digital, bad ki jingtei kiba kham shajrong.
Ka sorkar ka dang pynroi tyngeh ïa ka jingpule kaba pynshong nongrim ha ka AI, ka jingpynroi ïa ki sap, ki jingpynmih ïa ki rukom im, bad ka jingkylla ha ka digital ban pynkhreh ïa ki samla jong ka jylla na ka bynta ki lad ki lynti lashai.
Ha kane ka jingleit jngoh, u Myntri Rangbahduh ka ri u Narendra Modi bad ka President Droupadi Murmu ki la leit jngoh ruh ïa kawei ka ïew tynrai ha Mayurbhanj, ha kaba ki la ïaroh ïa ka pateng riewlum ba riewspah jong ka Odisha, ki jingtrei kti jong ki trai ri trai muluk, bad ka jingseng kam seng jam jong ka thaiñ.
Ka jingleit jngoh ka la pynpaw ïa ka jinglong kyrpang jong ka kolshor jong ka jylla katba ka pyni ïa ka jingangnud jong ka ban kyntiew ïa ka roi ka par kaba nangroi.
U Majhi u la pynskhem biang ba da ka jingïalam jong u Myntri Rangbahduh ka ri u Narendra Modi bad ka jingkyrshan jong ka sorkar India, ka Odisha ka kut jingmut ban leh ïa ka bynta ba hakhmat eh ha ka jingthmu jong ka Viksit Bharat.
U la pynpaw ka jingshaniah ba ki jingtei kiba khlaiñ, ka jingpynroi ïa ki karkhana, ka jingkiew ha ka teknoloji, bad ki samla kiba la pynkup bor kin pynkylla ïa ka Odisha sha kawei na ki jaka pynroi ba pawnam jong ka India.
Da ka jingbei tyngka kaba khlem pat ju jia mynno mynno ruh, ka jingpynheh ïa ki karkhana, bad ka lynti pynroi kaba shai, ka Odisha ka dang thoh ïa ka lynnong ba thymmai jong ka jingkiew hapoh ka jingïalam jong u Myntri Rangbah ka jylla u Mohan Charan Majhi, da kaba ïaid stet sha ka thong jong ka Odisha Viksit.
