Guwahati, Nailur:
Ki pulit jong ka tnat Railway Protection Force (RPF) jong ka North East Frontier Railway (NFR) ki la ïoh ban pyllait ïa kumba 23 ngut ki khynnah rit ha palat shi taïew jong ka jingpynlong ïa ka jingpyntreikam na ka bynta ban wad ïa kum kine ki khynnah ïa kaba la pynlong ha kiba bun ki rel bad ki jaka sangeh rel ha ka thaiñ.
U heh ba dei khmih jong ka tnat Railway u la pyntip ba ïa kane ka jingpyntreikam la pynlong naduh ka 8 tarik, Nailur haduh ka 17 tarik, Nailur. Ki pulit jong ka RPF ki la ïoh ban kem ïa uwei u briew uba la donkti ha ka kam khaïi briew.
Ïa kane ka jingpyntreikam la pynlong ha kiba bun ki jaka sangeh rel kiba kynthup ha New Bongaigaon, New Jalpaiguri, Jalpaiguri Road, Samsi, Badarpur, Barsoi, Rangiya, Katihar bad Dimapur.
Ïa baroh kine kiba la shah pyllait hadien la aiti sha ki Childline kiba dei khmih ha kine ki jaka bad ban pyndep ïa ki jingpyntreikam kumba dei rukom bad ban pynphai pat sha ki bahaïing hadien ba la dep ban leh ïa ki jingdonkam baroh.
