![Ujor ejahar u nongïalam ka seng Congress pyrshah ïa u Sarma debabrata](https://unongsainhima.com/wp-content/uploads/2023/09/debabrata-720x432.jpg)
Guwahati, Nailur:
U heh nongïalam jong ka seng Congress ha Assam u Debabrata Saikia u la phah da ka jingujor ejahar pyrshah ïa u Myntri Rangbah u Himanta Biswa Sarma uba la ai jingmut bad pynshit ban thang ïa ka jaka sah jong ka Sonia Gandhi.
U nongïalam jong ka seng Congress u la buh ïa kane ka jingmudui ejahar ha Nazira Model Police Station kaba don ha Sivasagar distrik jong ka Assam ha ka sngi Balang.
Ha kane ka jingujor, u nongïalam ka seng Congress u la dawa ba la dei ban pynngat ïa u Sarma ha ki kyndon aiñ halor kine ki jingpynshit jong u kiba lah ban wanrah ïa ki jingïakynad bad ki kam thombor. Kane ka jingkren pynshit jong u Sarma ka la long ha ka por ba la don ka jingïalang ha ka 18 tarik, Nailur ha ka jaka ban pynlong ïa ka ilekshon ha Madhya Pradesh ha kaba u la kynthoh jur ïa ka kynhun nongïalam jong ka seng Congress.