I. R. Dkhar
Dang shen, kumba shibnai tam ei ei mynta, ki Nongmihkhmat na Meghalaya kaba kynthup ïa u Chief Minister, ki Minister, ki MLA kum ka delegation, ki la leit sha Delhi ban ïa kynduh ia u Prime Minister da kaba ai jingthoh ha u halor ban ai noh ïa ka ILP bad ka jingithuh ïa ka ktien Khasi bad Garo ha ka 8th Schedule jong ka Riti Synshar (Constitution) ka ri India. Kane ka delegation, kumba ngi iohi na ki Kotkhubor, ki la kyrpad ïa u Prime Minister Narendra Modi bad ki da ai ruh da ka Memorandum halor kine ki issue khnang ba u Prime Minister un leh ïa kaba donkam. U Prime Minister u la sngap ïa ki bad la ong ba un sa peit bad bishar bniah ïa kine ki jingdawa jong ka Sorkar Meghalaya. Kane kam dei ka sien banyngkong ba ki Minister ka Meghalaya ki la leit Delhi, hynrei jan man ka por. Hynrei kane ka jingleit Delhi u Chief Minister bad ki Minister jong u, ka shu long kam kai namar u Prime Minister u shu buh teng ïa kine ki issue. Hakhmat u lah ban kular ïa kiba un peit ïa ki jingdawa jong ki, hynrei tang shu lait na ka khmat jong ki, u la buh sharud. Ka don ka jingong ba ki jingthoh bad jingkyrpad jong ka Jylla Meghalaya ïa u PM bad ruh ïa ki Minister ka BJP ha Delhi, ka shu kut noh tang ha ki ktien khlem kam. Kim kheiñ snep eiei ïa kum kane ka Sorkar Meghalaya kaba shu pan-shi-pan bad shu dawa-shi-dawa ïa kawei ka kam ha-dien kawei.
Nalor kitei ki mat kaba la sah teng da ki snem, ka Sorkar Meghalaya ka shu leit ud leit nam kum u nongkhrong ïa ka Sorkar India hapoh Delhi na ka bynta ki jingdonkam na ka por sha ka por. Lada dei ba donkam pisa, ki leit ud leit nam beit ia ka Sorkar India, lada dei ïa kano kano ka bynta, ki leit beit tang sha Delhi.Ka Sorkar Meghalaya, ka dei ka Sorkar ka bym don eiei na lade. Ka shu shaniah beit na ka Sorkar BJP ha Delhi ban ai ïa kane ïa katai. Ka long thik kumba leit nguh leit dem hakhmat ki Minister, la ka long ha kano kano ka mat ne tnat treikam, ban ioh jingïarap ne pisa. Nalade, ka Sorkar Meghalaya kam lah ban pynbiang lut ïa ki jingduna.
ïa kiwei ki jingdonkam, ka Sorkar BJP ha Delhi, ka ai da kaba shu leit ud leit nam jan man ka por bunsien bunsien, tang da kaba leh kumta, ka jingïarap ka wan, lym kumta ka long lehnohei.
Kitei ki mat kaba dei ïa ka ILP bad jingithuh ïa ka ktien Khasi bad Garo, ki dei ki mat ba la dep rai da ka ka Sorkar Meghalaya naduh palat 3 snem mynta, hynrei ki Minister Delhi kim kwah ban ai namar ka don kaei re kaei sha lyndet. Ka jingkyrpad ban ithuh ïa ka ktien Khasi bad Garo lei lei, ka dei kaba la dep rai bad pass da ka Sorkar Meghalaya, nga tharai la dap kumba 10 snem eiei mynta, hynrei balei ka Sorkar India ka pynslem. Hato kam dei ba don eiei sha lyndet? Ka Sorkar Meghalaya ka hap ban dang ïai ban bad pynkynmaw ïa ka Sorkar BJP ha Delhi khlem sangeh bad ban thaw ki lad ki lynti kumno ban ioh ïa ki. Imat tang lada khyllem noh ka Sorkar BJP ha Delhi, lehse la lah ban ioh ïa kine ki jingdawa jong ka Sorkar Meghalaya. Ngi khmih lynti ba ka por kan sa wan ban ioh ïa kitei ki jingdawa.
