Silchar, Nailur:
Ki pulit jong ka Assam ki la kem ïa lai ngut ki poiwir Kuki kiba na ka thaiñ kaba la shah ktah jur na ki jingjia ïakynad jong ka Manipur, ha kaba la kynnoh ba ki la donkti ha ka ban tuh ïa ki tiar siat na Cachar distrik.
Ïa kine kiba la shahkem la tip kyrteng kum Dimngel Lalboi Michael, Paojalen Dimngel, bad u Thangboi Dimngel, kine baroh ki dei ki nongshong shnong jong ka Saijong bad na Paohao kiba don ha Kangpokpi distrik jong ka Manipur.
Kine ki lai ngut ki la shahkem ha ki pulit jong ka Assam na Cachar distrik katba ki dang thmu ban leit jingleit da ka kali kaba don ïa u Registration number jong ka jylla Mizoram.
U Subrata Sen, uba long u Additional SP jong ka Cachar distrik, u la pynshisha da kaba ong ba ki la don kumba lai ngut ki briew kiba la donkti ha ka ban tuh bad lute na ki dukan bad ki Petrol pump ha ki ar bnai ba la lah.
Ha ki ar bnai ba la leit, kine ki runar ki la lute ïa ka pisa kaba T. 3-4 lak bad kiwei pat ki tiar kiba remdor na kiba bun tylli ki dukan, kynthup ka Wine bad ki tiar Hardware bad kumjuh ki la leit lute ruh na ki Petrol pump, la ïathuh u heh pulit.
